Qyzylordada 264 mln teńgeden astam alıment qaryzy óndirildi
QYZYLORDA. KAZINFORM – Bıylǵy 9 aıdyń qorytyndysyna sáıkes qyzylordalyq jeke sot oryndaýshylardyń óndirisinde alıment óndirý jónindegi 15 321 atqarýshylyq is bar. Onyń 2368-i tolyq aıaqtaldy.
Sot oryndaýshylar men múddeli memlekettik organdardyń birlesken júıeli jumysy tıimdiligin dáleldep otyr.
- Alıment bereshegin óteý úshin 264 mln 720 myń teńgeden astam qarjy óndirildi. Ákimshilik quqyq buzýshylyq týraly kodekstiń 669-babynyń 1-bóligine sáıkes 151 boryshker ákimshilik jaýapkershilikke tartyldy. Mundaı jandarǵa qatysty ákimshilik qamaý nemese aıyppul salý sharalary da qoldanylady. Alıment tóleýden jaltaryp, eskertýge qulaq aspaı júrgen 42 boryshkerge qatysty Qylmystyq kodekstiń 139-baby aıasynda jaýapqa tartý týraly usynystar joldandy. Nátıjesinde 20 boryshker qylmystyq jaýapkershilikke tartyldy, - dedi oblystyq ádilet departamentiniń basshysy Baýken Álmesh.
Búginde 202 boryshkerge izdeý jarııalanǵan. Barlyǵynyń shoty men múlkine tyıym salyndy.
- Bereshekti óndirýdegi negizgi máseleler — boryshkerlerdiń týystarynyń atyna múlikterin tirkep, tabysyn jasyrýy, turaqty jumys ornynyń bolmaýy jáne qaryzdy tóleýden qasaqana jaltarýy. Bul máselelerdi sheshý jáne bereshekti óndirip alýdy jedeldetý baǵytynda keshendi jumys atqarylyp jatyr. Prokýratýra organdarynyń bastamasymen, jeke sot oryndaýshylar jáne jergilikti ákimdik ókilderiniń qatysýymen arnaıy keńester ótkizildi. Nátıjesinde boryshkerler úshin 32 ret bos jumys oryndarynyń jármeńkesi uıymdastyryldy. 40 boryshker jumyspen qamtyldy, - dedi departament basshysy.
Eske salaıyq, 2026 jylǵy 25 tamyzdan bastap kámeletke tolmaǵan balalardy jáne eńbekke qabiletsiz adamdardy asyraýǵa arnalǵan alıment qarajatyn arnaıy banktik shottarǵa aýdarýdyń jańa tártibi qoldanylady.
Maqsat – alıment retinde óndirilgen qarajattyń maqsatty túrde paıdalanylýyn, balalar men alıment alýshylardyń quqyǵynyń qorǵalýyn qamtamasyz etý.
