Qyzylordada 250-den asa elektr baǵanasy qulap, 80 shaqyrymǵa jýyq jeli úzildi
QYZYLORDA. KAZINFORM — Qystyń sońǵy kúnderi qyzylordalyqtardy tabıǵattyń tosyn minezi ábden ábigerge salǵan bolatyn. Oblys ákimdigi synyń saldaryn joıý jumysy áli jalǵasyp jatqanyn málimdedi.
Nóser jańbyr, qatty jel men aıazdyń kesirinen Qyzylorda qalasy men Syrdarııa, Jalaǵash, Qarmaqshy aýdandaryna qarasty birqatar eldi mekendegi elektr jelilerine, qondyrǵylarǵa, aǵashtarǵa zaqym keldi. Barlyǵy 250-den astam elektr baǵanasy qulap, 80 shaqyrymǵa jýyq jeli úzildi.
— Apatty jaǵdaıdy qalpyna keltirý maqsatynda jedel shtab quryldy. «Qyzylorda elektr taratý toraptary» kompanııasynyń 170-ten astam mamanynan quralǵan jedel jóndeý brıgadalary, 80 arnaıy tehnıka jumyldyryldy. Turǵyndardy múmkindiginshe qysqa merzimde elektr energııasymen qaıta qamtamasyz etý úshin 24 saǵat boıy úzilissiz, kúsheıtilgen rejımdegi jumys eki aýysymda júrgizilip jatyr, — delingen habarlamada.
Eske salsaq, kóktaıǵaq kezinde jaıaý júrginshiler men kólik qozǵalysy shektelip, kommýnaldyq qyzmet kúsheıtilgen rejımge kóshirildi.
