Qyzylordada 250 áıel balasyna alıment tóleýden jaltarǵan

QYZYLORDA. KAZINFORM – Qyzylordalyq sot oryndaýshylardyń óndirisinde 276 452 atqarý qujaty bolsa, sonyń 13 177-si – alıment sanatyndaǵy ister. 

Barlyq qujattyń 13,9%-y problemalyq alıment óndirý baǵytynda. Jaýapsyz boryshkerlerdiń kesirinen qordalanǵan qaryz somasy 400,5 mln teńgege jýyqtady. Onyń 255 mln teńgesi jyl basynan beri, al 145,5 mln teńgesi múldem tólenbegen.

– Boryshkerler arasynda alıment qaryzy 5 mln, tipti 8 mln teńgege jetkender bar. Jeke sot oryndaýshylar olarǵa qatysty tıisti sharalar qoldandy. Sonyń 1-i qaryzynyń ornyna áıeliniń atyna úıin aýdaryp berdi, - dedi oblystyq ádilet departamentiniń basshysy Irına Bákisheva. 

Alıment tóleýden jaltaryp júrgen 28 adam Ákimshilik kodekstiń 669-babynyń 1-bóligimen ákimshilik jaýapkershilikke tartyldy. Qylmystyq kodekstiń 139-babymen qylmystyq qýadalaý organyna 5 adamǵa qatysty usynys joldandy. Materıaldar sotqa deıingi tergep-tekserýdiń biryńǵaı tizimine tirkelip, boryshkerler tergep-tekserilip jatyr. 

Qyzylorda oblysynda alıment tólemeı júrgenderdiń 12 320-sy er adam bolsa, 250-i — áıel adam.

Al, ótken jyly elimizde balasyna alıment tólemegeni úshin 4,5 myńnan astam boryshker ákimshilik jaýapkershilikke tartyldy.