Qyzylordada 246 mln teńge kólik salyǵy tólenbegen

QYZYLORDA. KAZINFORM – Bıyl 3 aı ishinde Qyzylordada kólik salyǵy ótken jyldyń osy kezeńine qaraǵanda 270 mln teńge artyq tústi. 

Al kólik salyǵynyń qaryzy 246 mln teńge bolyp otyr. Degenmen bul salystyrmaly túrde 29 mln teńgege az.

– Jeke sot oryndaýshylarmen, polıtsııa departamentimen birlesken reıdtik is-sharalar nátıjesinde 95 tulǵadan 12,2 mln teńge salyq bereshegi óndirildi. Bul jerde kólik ıelerine aıtarymyz, tóleý merzimi ótken árbir kún úshin ósimpul esepteledi. Ol Ulttyq bank belgilegen qaıta qarjylandyrýdyń resmı mólsherlemesiniń 1,25 eselengen mólsherinde, - dedi Qyzylorda oblysy boıynsha kirister departamenti basshysynyń orynbasary Asqar Elemanov. 

Odan bólek, jeke sot oryndaýshylarǵa salyqtyq buıryqtar jiberiledi. Jeke sot oryndaýshylar múlik pen bank shottaryna tyıym salyp, elden tys jerlerge shyǵýǵa shekteý qoıady. Bul rette qaryz somasynyń 25%-y shamasyndaǵy sot shyǵyny da ustalady. 

Árbir salyq túriniń mólsheri, ony tóleý merzimi Salyq kodeksinde anyq kórsetilgen. Soǵan sáıkes elimizde kólik salyǵyn tóleý merzimi 1 sáýirde aıaqtaldy.

Aıta keteıik, Májilis keshe Salyq kodeksiniń jańa jobasyn birinshi oqylymda maquldady.