Qyzylordada 240 páterlik alty kópqabatty turǵyn úı paıdalanýǵa berildi

Páter kiltterin tabystaý rásimine qala ákimi Nurjan Ahatov, máslıhat depýtattary, zııaly qaýym ókilderi men ardagerler qatysty.

Saltanatty jıynda sóz sóılegen qala ákimi Memleket basshysynyń turǵyn úıdiń qoljetimdiligin arttyrý jónindegi tapsyrmasyna sáıkes óńirde júıeli jumystar atqarylyp jatqanyn atap ótti.

– Prezıdent óz Joldaýynda turǵyndar, ásirese áleýmettik turǵydan álsiz toptar úshin baspananyń qoljetimdiligin arttyrý qajettigin aıtqan bolatyn. Memleket basshysy men Úkimettiń qoldaýynyń arqasynda bul baǵyttaǵy jobalar sátti júzege asyrylyp keledi. Sonyń nátıjesinde jyl basynan beri 655 otbasy qonys toıyn toılady. Jyl sońyna deıin taǵy 1 581 páter paıdalanýǵa beriledi, – dedi Nurjan Ahatov.

Qala ákiminiń aıtýynsha, bıyl turǵyn úı qurylysyna bıýdjetten shamamen 58 mlrd teńge bólingen. Bul qarajatqa 31 kópqabatty turǵyn úı salý josparlanǵan. Onyń ishinde 945 páter ıpotekalyq baǵdarlama arqyly berilse, 1 336 páter áleýmettik osal toptarǵa arnalmaq.

Jańa turǵyn úı kesheniniń jalpy aýmaǵy 15 600 sharshy metrdi quraıdy. Qurylys jumystaryna 4,5 mlrd teńge jumsalǵan.

Sondaı-aq jıynda turǵyn úılerdi sapaly salýǵa úles qosqan qurylysshylar oblys ákiminiń Alǵys hatymen marapattaldy. Oblystyq ardagerler keńesiniń tóraǵasy Serik Dúısenbaev turǵyndardy qonys toıymen quttyqtady.

Aıta keteıik, sońǵy jyldary Qyzylorda qalasynda zamanaýı úlgidegi 7, 9 jáne 12 qabatty turǵyn úılerdiń qurylysy qarqyn alǵan.