Qyzylordada 215 mamandandyrylǵan egý kabıneti jumys isteıdi
QYZYLORDA. KAZINFORM — DDSU Eýropalyq óńirlik bıýrosynyń usynysymen 2005 jyldan beri ımmýndaý aptalyǵy ótip keledi. Bıyl bul naýqan 19-25 sáýir aralyǵyna belgilendi. Qyzylordalyq epıdemıolog dárigerler bul kúnderi balalaryn ımmýndaýdan bas tartqan ata-analarmen jumys isteýge kóńil bólip otyr.
Immýndaý aptalyǵy bir mezgilde barlyq elde júrgiziledi. Bul naýqan halyqtyń ekpe profılaktıkasyna oń kózqarasyn qalyptastyrýǵa, adamdardyń densaýlyǵy men ál-aýqatyn saqtaý, ómir súrý uzaqtyǵyn arttyrý úshin ımmýndaýdyń mańyzdylyǵyn nasıhattaýǵa baǵyttalǵan.
— Profılaktıkalyq ekpe 21 aýrýǵa qarsy júzege asyrylady. Budan basqa jekelegen kásiptik toptarǵa, asa qaýipti ınfektsııa túrleri boıynsha qolaısyz elderge baratyn tabıǵı-oshaqty aýrýlar deńgeıi joǵary aýmaqtarda turatyn adamdarǵa jáne ınfektsııa oshaǵyndaǵy epıdemııalyq kórsetkish boıynsha júrgiziledi. Búgingi kúni 457 adamnyń ekpeden bas tartqany belgili bolyp otyr. Mundaı kózqarastyń qalyptasýyna birden-bir sebep — áleýmettik jelilerde jarııalanǵan negizsiz aqparat. Ózara dıalog ornatýdyń arqasynda oıyn ózgertip, vaktsına alyp jatqandar joq emes. Jyl basynan beri osyndaı 18 ata-ana ekpe saldyrdy, — dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Profılaktıkalyq ekpeni mamandandyrylǵan egý kabınetterinde arnaıy daıyndyqtan ótken meıirgerler salady. Qyzylorda oblysynda mundaı 215 kabınet bar. Shalǵaı eldi mekenderdiń turǵyndaryna 44 jyljymaly egý brıgadasy qyzmet kórsetedi. Mamandar egýden keıin birde-bir asqyný jaǵdaıy tirkelmegenin alǵa tartyp otyr.
— Qandaı da bir suraq týyndasa, Qazaqstan boıynsha 7701 nómirli jedel jelige habarlasýǵa bolady. Ekpe boıynsha kóp aqparat egu.kz saıtynda jarııalanǵan, — dedi Álııa Ábdiqaıymova.
Biz buǵan deıin elde vaktsınadan bas tartý jaǵdaılary sońǵy 8 jylda 4,8 ese artqanyn jazǵan edik.
