Qyzylordada 21 adam 70 mln teńge salǵan qarjy pıramıdasy qyzmetin toqtatty
QYZYLORDA. KAZINFORM — Qyzylorda soty «Fari Invest» qarjy pıramıdasyna qatysty qylmystyq is boıynsha úkimi shyǵardy.
Oblys boıynsha ekonomıkalyq tergep-tekserý departamenti uıymnyń zańsyz qyzmetin áshkerelep, jolyn kesti.
— Qyzylorda qalasynyń turǵyny áıelder kıimin satatyn dúken ashyp, áleýetti salymshylarmen baılanys ornatqan. Keıin WhatsApp messendjerinde «Baı qyzdar» atty top qurǵan. Onda «Fari_Invest» ınvestıtsııalyq jobasy arqyly salynǵan qarajatqa joǵary tabys tólenetinin, sondaı-aq belgili bir mólsherde qarjy salǵandarǵa altyn buıymdar men «iPhone» uıaly telefony syılyqqa beriletinin ýáde etken. Senimge kirý úshin birneshe ekinshi deńgeıli bankte anasynyń atyna jeke kásipkerlikke arnalǵan shottar ashqyzyp, olardy óz qyzmetinde paıdalanǵan. Jańa salymshy tartqan qatysýshylarǵa qosymsha syıaqy beriletinin habarlap, azamattardyń senimine kirip, olardyń qarajatyn jeke basynyń paıdasyna jumsaǵan, — dedi departament basshysynyń orynbasary Rýslan Satybaldıev.
Sot úkimimen azamatsha Qylmystyq kodekstiń 217-babynyń 3-bóliginiń 2-tarmaǵymen kináli dep tanyldy. 7 jylǵa azamattardan aqshalaı qarajat jáne ınvestıtsııa tartýǵa baılanysty qyzmetpen aınalysý quqyǵynan, 5 jylǵa bas bostandyǵynan aıyryldy.
— Biraq Qylmystyq kodekstiń 74-babynyń 1-bóligimen 14 jasqa tolmaǵan balasynyń bolýyna baılanysty jazany óteý merzimi keıinge qaldyry. Sot jábirlenýshilerdiń azamattyq talabyn tolyq kólemde qanaǵattandyrdy. Sottalǵannan materıaldyq zalaldy óndirý týraly sheshim qabyldady, — dedi ol.
Atalǵan qarjy pıramıdasyna baılanysty 21 adamnyń materıaldyq shyǵyny 70 mln teńgeden asty.
Buǵan deıin Batys Qazaqstan oblysy boıynsha ekonomıkalyq tergep-tekserý departamenti Imrat Group qarjy pıramıdasynyń qyzmetin toqtatty.
