Qyzylordada 200-ge jýyq áıel aq jaýlyq pen kımeshek sherýine qatysty
QYZYLORDA. KAZINFORM – Qyzylorda qalasyndaǵy Anaǵa taǵzym ortalyǵy búgin «Aq jaýlyqtan aq kımeshekke deıin» oblystyq etno-mádenı festıvalin uıymdastyrdy. Maqsat – qazaq áıeliniń ulttyq bolmysyn aıshyqtaıtyn aq jaýlyq pen kımeshektiń tarıhı, mádenı jáne tárbıelik mánin nasıhattap, urpaqtar sabaqtastyǵyn nyǵaıtý.
Taǵylymdy is-shara «Syr Ana» monýmenti alańynan bastaldy. Alǵashqy bóliminde kımeshektiń syrtynan oralatyn kúndik baskıimin 21 metrlik aq matamen oraý dástúri kórsetildi. Taqyryptyq kórinis arqyly ulttyq baskıimniń tarıhı-mádenı máni men qazaq áıelderiniń ómirindegi orny tanystyryldy.
Al mańyzdy bóligi aq jaýlyqty analar men kımeshekti ájelerdiń saltanatty sherýi boldy. Ulttyq biregeılik pen urpaqtar sabaqtastyǵyn aıshyqtaǵan sherý «Syr bolashaǵy» quzyrettilik ortalyǵynan bastalyp, Anaǵa taǵzym ortalyǵyna deıin jalǵasty. 200-ge jýyq áıel qatysqan merekelik sherýge ájeler ansamblderi, bilim jáne mádenıet salasynyń ókilderi, «Altyn alqa» ıegerleri men kópbalaly analar, qoǵam belsendileri, ónerpazdar qatysty.
Festıval Anaǵa taǵzym ortalyǵynyń alańynda qorytyndylandy. Oblystyq mádenıet, arhıvter jáne qujattama basqarmasy basshysynyń orynbasary Ǵalııa Baısynova aqjaýlyqty analardyń qoǵamdaǵy ornyna, áje ónegesi men ulttyq qundylyqtardy urpaqtan urpaqqa jetkizýdegi mańyzyna toqtaldy. Sondaı-aq taǵylymdy sharany uıymdastyrýǵa úles qosqan analarǵa basqarma basshysynyń alǵys haty men estelik syılyqtar tabystady.
Festıval aıasynda kópshilik nazaryna kımeshektiń tórt úlgisi men jaýlyqtyń úsh obrazy usynylǵan taqyryptyq qoıylym kórsetildi. Ortalyqtyń qolóner sheberleri daıyndaǵan kımeshekter kenepti shashaqpen árleý, jabaǵy júnmen jıekteý, toqyma jippen órnekteý jáne oıý-órneksiz tigý erekshelikterimen tanystyryldy.
Al jaýlyq úlgileri áıeldiń otbasylyq ómir kezeńderi men bala sanyna baılanysty kıiný úlgilerin kórsetti. Osy arqyly qazaq áıeliniń ulttyq bolmysy men dástúrli kıim mádenıetiniń san qyrly erekshelikteri aıshyqtaldy.
Festıval kontserttik baǵdarlamaǵa ulasty.
Eske sala ketsek, jýyrda Almatyda Jazıra Jumasheva men Asel Ábilqaı esimdi eki sýretshiniń týyndylaryn biriktirgen «Ǵasyrlar jańǵyryǵy: kıiz jáne kenep» atty kórme ashylǵanyn jazdyq.
