Qyzylordada 200-den astam balanyń beımezgil ýaqytta úıden jyraqta júrgeni anyqtaldy

QYZYLORDA. KAZINFORM — Qyzylordada «Jasóspirim» jedel profılaktıkalyq is-sharasy bastalǵan 4 kún ishinde 264 ákimshilik hattama rásimdeldi. 

Oblystyq polıtsııa departamentiniń málimetine súıensek, 4 jasóspirim ishki ister organdarynyń esebine alyndy. Qadaǵalaýsyz jáne panasyz qalǵan 2 jasóspirim kámeletke tolmaǵandardy beıimdeý ortalyǵyna jatqyzyldy.

— Balalardy tárbıeleý jónindegi mindetterdi oryndamaǵany úshin 30 ata-anaǵa hattama toltyryldy. Kámeletke tolmaǵandardyń túngi ýaqytta oıyn-saýyq mekemelerinde bolýyna jol bergen 6, 21 jasqa tolmaǵandarǵa temeki nemese temeki buıymdaryn satqan 1 quqyq buzý anyqtaldy. Kámeletke tolmaǵandar tarapynan 7 buzaqylyq deregi tirkelip, olardyń zańdy ókilderine hattama toltyryldy, — delingen habarlamada.

Sonymen qatar 211 balanyń túngi ýaqytta zańdy ókilderin ertpeı oıyn-saýyq mekemelerinde, úıinen tys oryndarda júrgeni belgili boldy. Bala kútimine, oqýy men tárbıesine salǵyrt qaraǵan 10 ata-ana profılaktıkalyq esepke alyndy.

Aıta keteıik, «Jasóspirim» jedel profılaktıkalyq is-sharasy 6 mamyrǵa deıin jalǵasady. Ondaǵy maqsat — kámeletke tolmaǵandar arasynda quqyqbuzýshylyq pen qylmystyń aldyn alý, balalardyń quqyǵyn qorǵaý.

Ótken jyly Atyraý oblysynda 7 207 jasóspirimniń ákimshilik jáne qylmystyq quqyqbuzýshylyq jasaǵany anyqtaldy.