Qyzylordada 20 jyl zerttelgen Jankenttiń qupııalary kópshilikke tanystyryldy
QYZYLORDA. KAZINFORM – Búgin Qyzylordada «Oǵyzdardyń materıaldyq jáne rýhanı mádenıeti» atty ǵylymı-tanymdyq kitap-katalogynyń tanystyrylymy ótti. Sondaı-aq, «Jankent arheologııalyq ekspedıtsııasyna – 20 jyl» atty halyqaralyq ǵylymı-tájirıbelik dóńgelek ústel uıymdastyryldy.
Shara oǵyzdardyń rýhanı mádenıetin jurtshylyqqa keńinen nasıhattaýǵa, Jankenttiń tarıhı-arheologııalyq murasyn ǵylymı turǵyda zerdeleýge, otandyq jáne sheteldik ǵalymdar arasyndaǵy ózara yntymaqtastyqty nyǵaıtýǵa baǵyttaldy.
Qatysýshylar arnaıy uıymdastyrylǵan «Jankent qalasynyń jádigerleri» atty kórmeni, «Aptap ystyq kún astynda Jankentte ótken 20 jyl» fotokórmesin tamashalady. Onda arheologııalyq jádigerler jáne ekspedıtsııanyń jıyrma jyldyq zertteý jolyn beıneleıtin fotosýretter qoıylǵan.
Jıynǵa Reseı, Germanııa, Ulybrıtanııa, Ózbekstan jáne elimizdiń ár óńirinen kelgen ǵalymdar qatysyp, Jankent qalashyǵyn zertteý barysynda jınaqtaǵan ǵylymı eńbekterin tanystyrdy. Ashylý rásimine oblys ákiminiń keńesshisi Rýslan Rústemov, Qorqyt Ata atyndaǵy Qyzylorda ýnıversıtetiniń basqarma tóraǵasy – rektor Naýryzbaı Baıqadamov, Á.H. Marǵulan atyndaǵy Arheologııa ınstıtýtynyń bas dırektory, tarıh ǵylymdarynyń kandıdaty Aqan Ońǵaruly jáne Eberhard Karl atyndaǵy Tıýbıngen ýnıversıtetiniń qurmetti professory Heinrich Haerke qatysyp, Jankentti zertteýdiń tarıhı ári ǵylymı mańyzyna toqtaldy.
«Oǵyzdardyń materıaldyq jáne rýhanı mádenıeti» ǵylymı-tanymdyq kitap-katalogynda oǵyzdardyń tarıhy men rýhanı mádenıeti, turmys-tirshiligi, qolóneri men murasy keńinen qamtylǵan. Sonymen qatar Jankent qalashyǵynda júrgizilgen kópjyldyq arheologııalyq zertteýlerdiń nátıjesi júıelenip, qundy arheologııalyq jádigerler týraly ǵylymı málimetter usynylǵan.
Dóńgelek ústeldiń ekinshi bóliminde otandyq jáne sheteldik ǵalymdar Jankent pen Syr óńirindegi ortaǵasyrlyq qalalardyń tarıhy men arheologııasyna qatysty zertteý nátıjelerin ortaǵa saldy. Máskeý, Tıýbıngen, Lıverpýl, Samarqan, Astana, Almaty, Shymkent jáne Qyzylorda zertteýshileri ózara tájirıbe almasyp, Jankenttiń Syrdarııanyń tómengi aǵysyndaǵy ortaǵasyrlyq qalalar júıesindegi orny men oǵyzdar tarıhyn zerdeleýdegi mańyzyna qatysty jańa ǵylymı tujyrymdaryn usyndy.
Jıyrma jyldyq zertteý barysynda jınaqtalǵan mol ǵylymı materıal Jankent tarıhyn jańa qyrynan zerdeleýge múmkindik berip, oǵyz órkenıetiniń Syr óńirindegi tarıhı-mádenı ornyn tereńirek túsinýge jol ashty.
Ǵylymı basqosý qorytyndysynda zertteýshiler birqatar usynys aıtyp, tıisti rezolıýtsııa qabyldandy.
