Qyzylordada 20 jyl kezek kútkenderge jer berile bastady

QYZYLORDA. KAZINFORM — Qyzylorda qalasynda jer kezegin saryla kútken 70 myńnan astam adamnyń aldy jyljı bastady. Bul týraly qala ákimdiginen habarlady.

Ulttyq ekonomıka mınıstrliginiń 2015 jylǵy 27 naýryzdaǵy № 255 buıryǵymen bekitilgen qaǵıdaǵa sáıkes azamattardyń ótinishi bólip berýge arnalǵan alańdar nemese jeke turǵyn úı qurylysy úshin paıdalanylatyn bos aýmaqtar daıyn bolǵan kezde qanaǵattandyrylady.

Osy oraıda Kazinform tilshisiniń oblys ortalyǵynda jer kezegi qalaı jyljyp jatqany jónindegi suraǵyna qala ákimi Nurjan Ahatov jaýap berdi. 

— Byltyr biz prokýratýramen birge jumys atqardyq. Sol kezde 2005 jylǵy aryz ıelerinen jer ala almaı júrgen 300-deı adam qalǵan eken. Olardyń barlyǵyna habarlama joldandy. Bıyl 1 qańtardan 2006 jyldyń birinshi jartysynda kezekke turǵan azamattarǵa jer bere bastadyq. Jyljý bar. Jer telimderi negizinen qalanyń «Báıterek» shaǵyn aýdanynan berilip jatyr. Suranysqa sáıkes aýyldardan da úlestiriledi, — dedi ol.

Buǵan deıin 2006 jylǵy eseptegi 11 509 qyzylordalyqtyń kezegi áli bastalmaǵanyn habarlaǵanbyz.