Qyzylordada 20 myńnan astam turǵyn kıeli oryndar men zırattardy tazalady
QYZYLORDA. KAZINFORM – Qyzylorda oblysynda Memleket basshysy Qasym-Jomart Kemeluly Toqaevtyń bastamasymen júzege asyrylyp jatqan «Taza Qazaqstan» ekologııalyq baǵdarlamasy aıasynda oblys ákimdiginiń uıymdastyrýymen «Taǵzym orny taza bolsyn, rýh pen tazalyq – bir uǵym» atty jalpyhalyqtyq naýqan ótti.
Aktsııa barysynda óńirdegi tarıhı-mádenı eskertkishter, kıeli oryndar jáne kópshilik zırattar ornalasqan aýmaqtarda kórkeıtý men kógaldandyrý jumystary uıymdastyryldy. Sonymen qatar aǵash otyrǵyzý, qorshaýlardy jóndeý, joldardy tazalaý jáne retke keltirý sharalary júrgizildi. Іs-sharaǵa oblys turǵyndarymen qatar máslıhat depýtattary, ardagerler, zııaly qaýym ókilderi, memlekettik mekeme qyzmetkerleri, Qazaqstan halqy Assambleıasy men qoǵamdyq uıymdardyń músheleri jáne jastar belsendi qatysty.
Prezıdent Qasym-Jomart Toqaev «Taza Qazaqstan» baǵdarlamasynyń mańyzy týraly aıtqan sózinde qorshaǵan ortany taza ustaý ǵana emes, sonymen qatar oı-sana tazalyǵynyń da mańyzdy ekenin erekshe atap ótken edi. Negizinen kıeli oryndardy, zırattardy kútip ustaýdyń dástúrli erejeleri bar, olardyń basty talaptarynyń biri – tazalyq. «Óli razy bolmaı, tiri baıymaıdy» degen halyq danalyǵy ótkenge qurmet kórsetýdiń mańyzdylyǵyn bildiredi.
Qazaq halqynyń dúnıetanymynda qorymdar tek jerleý orny ǵana emes, sondaı-aq dúnıeden ótkenderge qurmet kórsetetin, ata-baba rýhyna taǵzym etetin qasıetti oryn sanalady. Sondyqtan keseneler men qorymdardyń tazalyǵyna jáne olardyń qaraýsyz qalmaýyna erekshe kóńil bólinedi. Mundaı bastamalar arqyly qoǵamda tazalyqqa degen jaýapkershilik artyp, ulttyq qundylyqtarǵa qurmet kúsheıedi.
Aıta keteıik, aımaq boıynsha 72 nysan kıeli oryndar tizimine engen. Qasıetti kesenelerge jergilikti bıýdjet pen demeýshilerdiń qoldaýymen restavratsııalyq jáne jóndeý jumystary júrgizilip, kelýshiler úshin ınfraqurylym jaqsardy. Aktsııa barysynda oblystaǵy 200-ge jýyq qasıetti oryn men zırat aýmaǵyn tazalaý jumystaryna 20 myńnan astam turǵyn qatysty. Bul baǵyttaǵy jumystar aldaǵy ýaqytta da jalǵasyn tabady.
