Qyzylordada 20-ǵa jýyq adamdy san soqtyrǵan alaıaqtar sottaldy

QYZYLORDA. KAZINFORM — Qyzylordada 20-ǵa jýyq adamdy kóligin satyp berip, aqshasyn bas paıdasyna jaratqan eki adam sottaldy.

Qylmystyq kodekstiń 190-baby 3-bóliginiń 1, 4-tarmaqtary, ıaǵnı aldaý jolymen bótenniń múlkin iri mólsherde birneshe ret jymqyrý boıynsha qylmystyq is Qyzylorda qalasynyń № 2 sotynda qaraldy.

— Sottalýshylardyń biri 2024 jyly avtomobılder men jeńil avtokólik quraldaryn bólshek saýdada satý maqsatynda «Suncar auto» jaýapkershiligi shekteýli seriktestigin shaǵyn kásipkerlik sýbektisi retinde tirkegen. Sybaılasy ekeýi sol seriktestiktiń avtosalony arqyly satyp beretinin, satylmaǵan jaǵdaıda 14 jumys kúni ishinde aqshasyn qaıtaratynyna sendirip, birneshe jábirlenýshini aldap, josyqsyz kelisimshart jasaǵan. Kólikti ózderiniń atyna aýdartyp ári satyp, satqannan túsken qarjyny óz maqsattaryna jaratyp otyrǵan, — delingen habarlamada.

Sottalýshylardyń kinási ózderiniń sotta bergen jaýabymen, jábirlenýshiler men kýágerlerdiń jaýaptarymen, oqıǵa ornyn qarap-tekserý, bettestirý hattamalarymen dáleldendi.

Sottalýshylardyń biri Qylmystyq kodekstiń 190-babynyń 3-bóliginiń 1, 4-tarmaqtarymen kináli dep tanylyp, oǵan 4 jyl 6 aı merzimge bas bostandyǵynan aıyrý jazasy taǵaıyndaldy.

Al sybaılasy Qylmystyq kodekstiń 190-babynyń 3-bóliginiń 1, 4-tarmaqtarymen 4 jyl merzimge bas bostandyǵynan aıyryldy. Sot sheshimimen 18 jábirlenýshige kólikteri, al 1 jábirlenýshige qarjylaı qaıtaryldy. Úkim zańdy kúshine engen joq.

Sondaı-aq Qyzylordada «Qnet» qarjy pıramıdasynyń qurylymdyq bólimshesin uıymdastyrý isi boıynsha sot úkimi shyqty.