Qyzylordada 1900-ge jýyq túp qarasora ósirgen alty adam ustaldy
ASTANA. KAZINFORM – «Qarasora – 2026» respýblıkalyq jedel-profılaktıkalyq is-sharasy aıasynda Qyzylorda oblysynda eki iri esirtki alqaby anyqtalyp, alty kúdikti ustaldy, dep habarlaıdy Polisia.kz.
QR Іshki ister mınıstrligi men Qyzylorda oblysy polıtsııa departamentiniń Esirtki qylmysyna qarsy is-qımyl basqarmasy qyzmetkerleri zańsyz esirtki ósimdikterin anyqtaý baǵytynda aýqymdy jumystar júrgizip jatyr.
Kezekti reıd barysynda polıtsııa qyzmetkerleri men Ulttyq ulannyń «Búrkit» arnaıy maqsattaǵy jasaǵy tikushaq arqyly áýeden baqylaý júrgizgen. Nátıjesinde Aral aýdanyna qarasty Jińishkequm eldi mekeni mańynan eki iri qarasora alqaby anyqtaldy.
«Birinshi alqapty tekserý kezinde 1090 túp qarasora ósimdigi jáne olardy sýarý men kútip-baptaýǵa arnalǵan arnaıy qural-jabdyqtar tárkilendi. Atalǵan derek boıynsha úsh kúdikti ustaldy. Al ekinshi alqaptan 849 túp qarasora ósimdigi, erekshe ıisi bar shóp salynǵan paket jáne ósimdik tuqymdary salynǵan paket tárkilendi. Bul derek boıynsha taǵy úsh kúdikti qolǵa tústi», – dep habarlady polıtsııa.
Tergeý barysynda alynǵan zattaı dáleldemelerge saraptama taǵaıyndaldy. Saraptama qorytyndysy tárkilengen ósimdikterdiń qarasora tuqymdasyna jatatynyn kórsetti.
Atalǵan faktiler boıynsha qylmystyq ister qozǵalyp, kúdiktiler qamaýǵa alyndy. Qazirgi ýaqytta sotqa deıingi tergep-tekserý amaldary júrgizilip jatyr.
Polıtsııanyń málimetinshe, «Qarasora – 2026» jedel-profılaktıkalyq is-sharasy bastalǵaly Qyzylorda oblysynda esirtkige qatysty 27 quqyq buzýshylyq deregi anyqtalǵan.
Aıta keteıik, Qyzylordada aýyldar mańynan esirtki alqaby tabyldy.
