Qyzylordada 19 myńnan astam bala balabaqshaǵa jalǵan tirkelgeni anyqtaldy

QYZYLORDA.  — Qyzylorda oblysynyń bilim berý salasyna sońǵy 3 jylda 812 mlrd 245 mln teńge, bıyl 302 mlrd teńge qaraldy. Bul týraly oblys ákiminiń baspasóz qyzmeti habarlady.

Bólingen qarjynyń túpkilikti maqsatqa jetýi árdaıym baqylaýda. 

— 2023 jyldan beri «Face-baqylaý» mobıldi qosymshasy qoldanysqa engizildi. Osylaısha balabaqshalarǵa jalǵan tirkelgen 19 263 bala anyqtaldy, 28 mlrd 100 mln teńge únemdeldi. Emhananyń jalǵan anyqtamasyn tirkeý, negizsiz demalys kúnderin anyqtaý esebinen 6 mlrd 700 mln teńge bıýdjetke qaıtaryldy, — delingen habarlamada.

Oblysta demografııalyq ósim men halyqtyń kóship-qoný belsendiligi artyp keledi. Osy sebepti oqýshy sany jyl saıyn artyp otyr.

— Jańa oqý jylynda 1-11 synypta 189 288 oqýshy tirkeldi. Ótken oqý jylymen salystyrǵanda 4 364 balaǵa kóbeıgen, — delingen ákimdik málimetinde. 

Aıta keterlik jáıt, vaýcherlik júıe engizilgennen keıin Shymkentte birneshe jekemenshik balabaqsha jumysyn toqtatty. Al memlekettik tapsyrys pen tólemaqyǵa qatysty sheshimder ózgermegen.