Qyzylordada 181 dúken alkogol satý talabyn buzǵan
QYZYLORDA. KAZINFORM – Qyzylorda oblysynda alkogoldi ishimdikti zańsyz satýdyń aldyn alý, qoǵamdyq oryndarda mas kúıde jasalatyn quqyqbuzýshylyq jáne qylmystyń jolyn kesý baǵytynda profılaktıkalyq jumys atqarylyp keledi.
Oblystyq Polıtsııa departamentiniń málimetinshe, jyl basynan beri 181 dúken satýshysynyń alkogol ónimin ótkizý talaptaryn buzǵany anyqtaldy. Olarǵa qatysty ákimshilik hattama toltyrylyp, sot qaýlysymen 10 aılyq eseptik kórsetkish mólsherinde aıyppul salyndy.
- Sonymen qatar lıtsenzııasy bar saýda oryndarynda 21 jasqa tolmaǵan azamattarǵa alkogol ónimin satý deregi boıynsha 30 ákimshilik hattama rásimdeldi. Al lıtsenzııasy joq dúkenderdiń 21 jasqa tolmaǵandarǵa alkogol ónimin satýy boıynsha 7 ákimshilik hattama toltyryldy. Qoǵamdyq orynda masań kúıde júrgen, alkogol ónimin tutynǵan kámeletke tolmaǵandardyń ata-analaryna qatysty 27 ákimshilik hattama rásimdeldi, - delingen habarlamada.
Ákimshilik quqyqbuzýshylyq týraly kodekstiń 200-babyna sáıkes meıramhana, bar, dámhanalarda jáne zańda kózdelgen ózge de oryndardy qospaǵanda, alkogol ónimin bólshek saýda arqyly saǵat 23:00-den kelesi kúngi 08:00-ge deıin satýǵa, quramyndaǵy etıl spırtiniń kólemdik úlesi 30 paıyzdan asatyn alkogol ónimin saǵat 21:00-den kelesi kúngi 12:00-ge deıin satýǵa tyıym salynady.
Tártip saqshylary zań talaptaryn buzý faktileri anyqtalǵan jaǵdaıda kináliler ákimshilik jaýapkershilikke tartylatynyn eskertti.
