Qyzylordada 15 jastaǵy qyzǵa úılengen 21 jastaǵy jigit 12 jylǵa sottalyp ketti
QYZYLORDA. KAZINFORM - Qyzylorda oblysynda 15 jastaǵy qyzǵa úılengen 21 jastaǵy jigit 12 jylǵa sottalyp ketti.
Bul oqıǵa jaıynda áleýmettik jeli betterinde jarııalandy. Onda ekeýiniń ata-analarynyń ruqsatymen úılengeni aıtylǵan. Keıinnen 15 jastaǵy qyz júktiligine baılanysty dárigerge kóringen. Emhanadaǵy mamandar bul jaıynda polıtseılerge jetkizgen.
Sol oqıǵadan keıin jas jigittiń ústinen qylmystyq is qozǵalyp, oǵan 12 jylǵa bas bostandyǵynan aıyrý jazasy taǵaıyndalǵan.
Atalǵan sot úkimine baılanysty Qyzylorda oblystyq soty Kazinform aqparat agenttigine túsinikteme berdi.
- Qyzylorda oblysynyń qylmystyq ister jónindegi mamandandyrylǵan aýdanaralyq sotynyń 2024 jylǵy 25 qarashadaǵy úkimimen jabyq sot otyrysynda sottalýshy QR Qylmystyq Kodeksiniń 122-babynyń 3-bóligi 1)-tarmaǵymen (kórineý on alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketterdi jasaý) kináli dep tanyldy.
Sottalýshy pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıyna shettetilip, 12 jylǵa bas bostandyǵynan aıyrýǵa sottalǵan. Sot úkimine 2024 jylǵy 17 jeltoqsanda apellıatsııalyq shaǵymdar túsken.
Qyzylorda oblystyq sotynyń qylmystyq ister jónindegi sot alqasynyń 2025 jylǵy 14 qańtardaǵy qaýlysymen birinshi saty sotynyń úkimi ózgerissiz, apellıatsııalyq shaǵymdar qanaǵattandyrýsyz qaldyryldy, - dep málim etti Qyzylorda oblystyq sotynan.
Eske salsaq, budan buryn Qyzylorda oblysynda bıýdjet qarajatyn óz maqsatyna paıdalanǵan bas esepshi sottaldy.