Qyzylordada 15 naýryz kúni ýchaskege kele almaıtyn jandarǵa qolaıly jaǵdaı jasalǵan
QYZYLORDA. KAZINFORM — Qyzylorda oblysynda 492 524 azamat 15 naýryz kúngi respýblıkalyq referendýmda daýys berýge quqyly.
Oblystyq aýmaqtyq referendým komıssııasynyń málimetinshe, onyń 213 452-si — Qyzylorda qalasynyń, qalǵany — aýdandardyń turǵyndary.
— Oblysta 2637 azamat naýqanda birinshi ret daýys berýge múmkindik alyp otyr. Onyń 36-sy 15 naýryz kúni 18 jasqa tolady, — delingen habarlamada.
Densaýlyq jaǵdaıyna baılanysty ýchaskege kelýge múmkindigi joq azamattardyń óz quqyǵyn paıdalanýyna jaǵdaı jasalyp otyr.
— Olar 15 naýryz kúni túski saǵat 12.00-ge deıin ótinish qaldyra alady. Mundaı jaǵdaıda komıssııanyń 2 múshesi tasymaldanatyn jáshikpen daýys berýdi uıymdastyrady. Qazirgi tańda oblys boıynsha 1668 azamattan ótinish tústi. Bul tsıfr áli kóbeıedi. Al ýchaskege kele alatyn múgedektigi bar daýys berýshiler úshin 15 naýryz kúni 63 ınvataksı jáne 49 ymdaý tili mamandarynyń kezekshiligi uıymdastyrylady, — delingen komıssııa málimetinde.
Múgedektigi bar azamattar daýys berý ýchaskelerinde jańa Konstıtýtsııanyń mátindik jáne aýdıo nusqadaǵy jobasymen tanysa alady.
Al osy kúni Qyzylorda qalasynda qoǵamdyq kólikter halyqqa tegin qyzmet kórsetedi.
