Qyzylordada 1400-ge jýyq bala qyzylsha juqtyrǵan

QYZYLORDA. KAZINFORM — Qyzylorda oblysynda qyzylsha aýrýyna shaldyqqandardyń basym bóligi aýrýǵa qarsy ekpe almaǵandar arasynan anyqtaldy.

Ótken jyly oblysta laboratorııalyq zertteý nátıjesimen qyzylsha aýrýynyń 1557 jaǵdaıy naqtylandy. Olardyń 1364-i — 14 jasqa deıingi balalar arasynda anyqtaldy. Onyń ishinde 365-i — bir jasqa tolmaǵan sábıler. Eresek turǵyndar arasynan 193 naýqas anyqtaldy.

— Oblystaǵy qyzylsha aýrýy boıynsha epıdemıologııalyq ahýaldy turaqty dep baǵalaýǵa bolady. Aýrýshańdyq kórsetkishi aıtarlyqtaı tómendedi. Oǵan shaldyqqandardyń basym bóligi aýrýǵa qarsy ekpe almaǵan. Olardyń sany jalpy syrqattanýshylyqtyń 72%-yn qurady. Negizgi sebepteri retinde medıtsınalyq qarsy kórsetilimderge baılanysty, egiletin jasqa jetpegen, vaktsınatsııadan bas tartý, josparly vaktsına alýǵa tıisti merzimde negizsiz sebeptermen kelmeý sekildi jaǵdaılardy aıta alamyz. Al 180 naýqastyń qyzylshaǵa qarsy ımmýndyq mártebesi belgisiz ekendigi anyqtaldy. Oǵan qosa keıbir naýqastar qyzylshaǵa qarsy ekpeniń tolyq kýrsyn almaǵan. Saldarynan aýrýdy juqtyryp alý deregi tirkelgen. Qyzylshaǵa qarsy jappaı qosymsha egý jumystarynyń tıimdiligi zor, — dedi Qyzylorda oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.

Qyzylshaǵa qarsy jappaı qosymsha egý nátıjesinde ıisti kontıngenttiń 96%-y ekpemen qamtyldy. Nátıjesinde aýrýshańdyq áldeqaıda azaıdy. Sol arqyly qazan-jeltoqsan aralyǵynda oǵan qatysty birde-bir derek tirkelgen joq.

Eske salsaq, budan buryn Qyzylorda oblysynda byltyr 92 adam koronavırýs juqtyrdy.