Qyzylordada 136 okrýgte máslıhat saılaýy ótedi
QYZYLORDA. KAZINFORM – Qyzylorda oblysynda 29 qarashaǵa belgilengen kezekten tys máslıhattar saılaýynda oblystyq, qalalyq jáne aýdandyq deńgeıde 152 depýtat saılanady.
Saılaý protsesin ázirleý men uıymdastyrýǵa arnalǵan arnaıy kúntizbelik jospar bekitildi.
- Óńirde 9 aýmaqtyq, 136 okrýgtik, 386 ýchaskelik saılaý komıssııasy bar. Búginnen bastap qala jáne aýdandarda okrýgtik komıssııalar jumysyna kiristi. Sebebi 14 qazannan 27 qazan kúngi saǵat 18.00-ge deıin kandıdattardan usyný qujattary qabyldanady. Kandıdattar men partııalyq tizimderdi tirkeý 1 qarasha kúni saǵat 18:00-ge deıin jalǵasady, - dedi oblystyq aýmaqtyq saılaý komıssııasynyń tóraǵasy Ádilbek Ersultanov.
Bul naýqan aralas júıede, ıaǵnı partııalyq tizim jáne ózin-ózi usynǵan kandıdattar arasynda ótedi. Okrýgtik saılaý komıssııalary árbir kandıdattan zańnama talaptaryna saı qujattardy qabyldap, usyný qorytyndysyn shyǵaryp, tirkeıdi.
Búginde 136 okrýgte 670 komıssııa múshesi qyzmet atqarady.
Eske salaıyq, Qazaqstanda máslıhat depýtattarynyń kezekten tys saılaýynda 12 mıllıonnan astam azamat daýys bere alady.
