Qyzylordada 103 jastaǵy soǵys ardageri qurmetke bólendi
QYZYLORDA.KAZINFORM — Búgin Qyzylorda oblysynyń ákimi Nurlybek Nálibaev Syrdarııa aýdanynyń Tereńózek kentinde turatyn Uly Otan soǵysynyń ardageri ıAhııa Tasyrovty Jeńistiń 80 jyldyǵymen quttyqtap, qurmet kórsetti.
Oblys ákiminiń baspasóz qyzmeti habarlaǵandaı, aımaq basshysy ardagerge Prezıdent Qasym-Jomart Toqaevtyń quttyqtaý haty men «Uly Otan soǵysyndaǵy Jeńiske 80 jyl» merekelik medalin tabystady. Dástúrge saı ıyǵyna shapan jaýyp, syı-sııapat kórsetti.
Uly Otan soǵysynyń ardageri, Syrdarııa aýdanynyń qurmeti azamaty, 103 jastaǵy ıAhııa Tasyrov 1942 jyly maıdanǵa attanǵan. Stalıngradty, Kýrskini, Polshany azat etýge qatysqan. Beıbit ómirde de belsendi eńbek etip, aýyl sharýashylyǵy óndirisiniń órkendeýine úles qosqan. «Qyzyl juldyz», І, ІІ dárejeli «Uly Otan soǵysy» ordenderi men birneshe medaldiń ıegeri, eldiń batagóı aqsaqaly.
Memleket basshysynyń tapsyrmasymen Jeńistiń 80 jyldyǵyn atap ótýge, qatary sıregen qart maıdangerlerge qurmet kórsetýge erekshe mán berilip otyr.
— Aımaqta Jeńis kúnin atap ótýdiń is-sharalar jospary bekitildi. Uly Otan soǵysyna qatysýshylarǵa, olarǵa teńestirilgen ardagerler men soǵys jyldary keminde alty aı eńbek etken tyl ardagerlerine tólenetin áleýmettik tólem mólsheri jyl saıyn artyp keledi. Búginde Qazaly jáne Syrdarııa aýdandarynda 2 soǵys ardageri turady. Olarǵa 5 mln teńgeden berilse, tyl eńbekkerleri, soǵys ardagerlerine teńestirilgender men múgedekter tólemi 40 AEK-ten 50 AEK-ke ulǵaıdy.
Bul baǵyttaǵy jumystar ári qaraı jalǵasyn tabady, — delingen habarlamada.
Aıta keteıik, Jeńis kúnin Qyzylordada 2 soǵys ardageri men 1700 tyl ardageri qarsy alyp otyr.