Qyzylordada 100-den astam kásipker memlekettik grant qarjysyn maqsatsyz paıdalanǵan
QYZYLORDA. KAZINFORM – Qyzylorda oblysynda sýbsıdııalanatyn jumys oryndarynyń shynaıylyǵyna monıtorıng júrgizildi. Monıtorıng qorytyndysyn oblystyq jumyspen qamtýdy úılestirý jáne áleýmettik baǵdarlamalar basqarmasy jarııalady.

Belgili bolǵandaı, 160 adam sýbsıdııalanatyn jumys oryndarynan bosatylyp, 193,1 mln. teńge bıýdjet qarajaty saqtalyp qaldy.
- Jalǵan tabel tapsyryp, jalaqy tólengen 6 adamnan 2,2 mln teńge bıýdjetke qaıtaryldy. Ótken jyly grant qarjysyn alyp, kásip ashqan 1 556 jeke kásipkerdiń bıznes josparynyń oryndalýyn tekserdik. Nátıjesinde 104 kásipkerdiń 143,8 mln teńgeni maqsatsyz paıdalanǵany anyqtaldy. 10 adamǵa tólengen 6,7 mln teńge bıýdjetke keri qaıtaryldy. Portalda jalǵan eseptilik usynǵan 94 adamnyń is qujaty sot qaraýyna joldandy. Búgingi kúni 75 adamnan 110,2 mln teńge grant qarajatyn memleket paıdasyna óndirý týraly sot sheshimderi shyǵaryldy, - dedi basqarma basshysy Ǵabıt Jańabaev.
Al 19 adamǵa qatysty sot protsesi áli aıaqtalǵan joq.
Buǵan deıin Májilistiń jalpy otyrysynda Eńbek jáne halyqty áleýmettik qorǵaý mınıstri Svetlana Jaqypova sýbsıdııalanatyn jumys oryndarynyń eki baǵyty qysqartylatynyn málim etken bolatyn.