Qyzylordada 10 vokzal jańǵyrtylady: Qazaly temirjol vokzaly iske qosyldy
ASTANA. KAZINFORM — Qyzylorda oblysynda temirjol vokzaldaryn jańǵyrtý baǵdarlamasyn iske asyrý jalǵasýda. Jóndeý jumystary aıaqtalǵannan keıin jolaýshylar úshin Qazaly temirjol vokzaly paıdalanýǵa berildi. Bul týraly Kólik mınıstrligi málim etti.
Jańartý Memleket basshysynyń tapsyrmasy boıynsha el boıynsha 124 temirjol vokzalyn aýqymdy jańǵyrtý baǵdarlamasy aıasynda júrgizildi. Bul — Táýelsizdik jyldaryndaǵy vokzal ınfraqurylymyn jańartýǵa baǵyttalǵan eń iri joba.
— Jumys barysynda ǵımarattyń qasbeti men ishki úı-jaılary tolyq jańartyldy, ınjenerlik jeliler, jylytý, sýmen jabdyqtaý jáne elektrmen jabdyqtaý júıeleri jańǵyrtyldy. Vokzalda zamanaýı kútý aımaqtary jasalyp, navıgatsııa jaqsartyldy, júrip-turýy shekteýli azamattar úshin qolaıly jaǵdaılar qamtamasyz etildi, — dep habarlady vedomstvodan.
Qazaly temirjol vokzaly óńirdiń negizgi kólik nysandarynyń biri bolyp tabylady, ol Qyzylorda oblysynyń elimizdiń basqa óńirlerimen jolaýshylar qatynasyn qamtamasyz etedi.
Jańǵyrtý jolaýshylarǵa qyzmet kórsetý sapasyn arttyryp, vokzalda bolý úshin anaǵurlym jaıly jaǵdaı jasaýǵa múmkindik berdi.
Jalpy Qyzylorda oblysynda baǵdarlama aıasynda 10 temirjol vokzaly jańǵyrtylyp jatyr. Buǵan deıin jańǵyrtýdan keıin Jańaqorǵan, Shıeli vokzaldary jáne Talap jolaýshylar platformasy paıdalanýǵa berilgen bolatyn.
Qazaly vokzalynyń ashylýy óńirdiń temirjol ınfraqurylymyn keshendi jańartýdyń kezekti kezeńi boldy.
Buǵan deıin Qyzylordada qaıta jańǵyrtylǵan Jańaqorǵan temirjol vokzaly ashylǵanyn jazdyq.
