Qyzylorda jurtshylyǵy sý tasqyny bolǵan óńirlerge kómek qolyn sozdy
QYZYLORDA. KAZINFORM - Qyzylorda oblysynyń turǵyndary elimizdiń sý tasqyny bolǵan aımaqtaryna gýmanıtarlyq jáne qarjylaı kómek kórsetip keledi.
Qazirge deıin Aqtóbe qalasy men atalǵan oblystyń Qobda aýdanyna 25 júk kóligimen 83 mln teńgeniń 112 tonna gýmanıtarlyq kómegi, 50 mln teńge bolatyn 20 tonna jem-shóp jetkizilgen edi.
Qazir Qostanaı, Aqtóbe oblystarynda 66 qyzylordalyq qutqarýshy áriptesterine kásibı kómek kórsetip jatyr. Syr óńirinen aparǵan arnaıy tehnıkalar, qaıyqtar, motopompalar da qutqarýshylardyń jumysyn jeńildetti. Atyraý oblysyna qajetti 50 myń dana qap jetkizildi.
Osy ıgi isterdiń jalǵasy retinde, búgin «Torǵaı Petroleým» aktsıonerlik qoǵamy Atyraý, Aqtóbe, Qostanaı, Batys jáne Soltústik Qazaqstan oblystaryna 50 mln teńgeniń 120 tonna qaıyrymdylyq kómegin jiberip jatyr.
Qıyndyqta qalǵan aımaqtardyń turǵyndaryna járdemdesý nıetin tanytqan azamattar «Jastar ortalyqtary», saýda úıleri men bazarlarda ashylǵan pýnktterge áli de kelýde.
