Qyzylorda jylý elektr ortalyǵyna 3 mln teńgege jýyq aıyppul salyndy
QYZYLORDA. KAZINFORM – Qyzylorda jylý elektr ortalyǵy Tabıǵı monopolııalar týraly zańnyń 26-babynyń 2-tarmaǵynyń 15- tarmaqshasynda kózdelgen mindetterdi oryndamaǵany úshin ákimshilik jaýapkershilikke tartyldy.
QR UEM Tabıǵı monopolııalardy retteý komıtetiniń Qyzylorda oblysy boıynsha departamenti anyqtaǵandaı, kásiporyn tabıǵı monopolııa sýbektisi úshin bekitilgen tarıftik smetany oryndamaǵan. Osyǵan baılanysty Ákimshilik quqyqbuzýshylyq týraly kodekstiń 164-babynyń 4-tarmaǵyna sáıkes 4 mln 152 myń teńge aıyppul tóleýge tıis bolǵan.
- Tabıǵı monopolııa sýbektisi departament qaýlysymen kelispeı, Qyzylorda qalasynyń ákimshilik quqyqbuzýshylyqtar jónindegi mamandandyrylǵan sotyna shaǵymmen júgindi. Sottyń qaýlysymen Ákimshilik quqyqbuzýshylyq týraly kodekstiń 829-babynyń 11-tarmaǵynyń 2-tarmaqshasy negizinde aıyppul mólsheri 30%-ǵa qysqardy. Nátıjesinde barlyǵy 2 mln 906 myń teńgeden astam ákimshilik aıyppul salyndy. Búgingi tańda aıyppul somasy memleket kirisine tolyq óndirildi, - delingen habarlamada.
Buǵan deıin QR UEM Tabıǵı monopolııalardy retteý komıtetiniń Qyzylorda oblysy boıynsha departamenti Jańaqorǵan aýdandyq kópbeıindi ortalyq aýrýhanasyn tekserý kezinde kemshilik anyqtaǵan edi.
