Qyzylorda-Jezqazǵan jolyna tartylatyn syrtqy qaryzdyń paıyzdyq mólsherlemesi qandaı

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Nurlan Baıbazarov Qyzylorda-Jezqazǵan jolyna Azııa damý bankinen tartylatyn syrtqy qaryzdyń paıyzdyq mólsherlemesi qandaı ekenin aıtty.

«Azııa damý bankimen Qyzylorda-Jezqazǵan jolyn salý boıynsha kelisimge qol qoıamyz. Kelisim boıynsha Azııa damý banki bizge 300 mln dollar aqsha bólip jatyr. Sharttary óte tıimdi. 20 jyldan astam ýaqytqa berilip jatyr. Óte uzaq ýaqytqa, tıimdi sharttarmen. Meniń oıymsha, bul óte jaqsy ınvestıtsııa. Óıtkeni Qyzylorda men Jezqazǵannyń arasyn jalǵaý biraz máseleni sheshedi. Jańa oblys (Ulytaý oblysy — red.) paıda boldy. Keıin osy baılanys ekonomıkanyń damýyna úlken úles qosady. Júk aınalymy kóbeıedi, adamdardyń ary-beri kelip turýyna, saýda jasaýyna jaqsy, qolaıly jaǵdaı jasaımyz dep oılaımyn», — dedi Nurlan Baıbazarov.

Vıtse-premer qaryzdyń paıyzdyq mólsherlemesin de atady.

«Paıyzdyq mólsherlemesine kelsek, Azııa damý banki 3-4 paıyz arasynda beredi. Óte tıimdi, uzaq merzimge. Qarjy kelesi jyldyń basynda túsedi, qurylys jumystary bastalady. Azııa damý bankimen seriktestik ornatqanymyzǵa 30 jyl boldy. Budan ári de Qazaqstanǵa qoldaý kórsetetinderin aıtyp jatyr. Qazir búkil álem jasyl energetıkaǵa kóship jatyr. Sol jaǵynan da kómektesýge daıyn», — dedi Ulttyq ekonomıka mınıstri.

Buǵan deıin habarlaǵanymyzdaı, jyl sońyna deıin 4,7 mlrd dollardyń 239 jobasy iske qosylady.