«Qyzylorda- Jezqazǵan» joly paıdalanýǵa berildi
QYZYLORDA. KAZINFORM — Búgin — Syr óńirindegi ǵana emes, el ómirindegi aıtýly kún! Óıtkeni ekonomıkanyń kúretamyry sanalatyn otandyq jol ınfraqurylymyn jetildirý tarıhynyń jańa paraǵy ashyldy. Halyq kópten kútken, kólik júrgizýshileri men jolaýshylardyń armanyna aınalǵan «Qyzylorda-Jezqazǵan» joly paıdalanýǵa berildi.
Saltanatty rásimge oblys ákimi Nurlybek Nálibaev, «Qazavtojol» UK» AQ basqarma tóraǵasy Darhan Imanashev, oblystyq máslıhat tóraǵasy Murat Tileýmbetov, quqyq qorǵaý organdarynyń birinshi basshylary, depýtattar jáne ardagerler qatysty.
Aımaq basshysy bul joldyń óńir ekonomıkasyna, óndiristiń órkendeýine, turǵyndardyń ál-aýqatynyń artýyna tıgizetin oń yqpaly men erekshe mańyzyn atap ótti.
— Búgin — aımaǵymyz úshin tarıhı kún! «Qyzylorda-Jezqazǵan» avtomobıl jolynyń ashylý rásiminde bas qostyq. Halqymyz uzaq jyldan beri armandap kelgen avtojoldy salýǵa qoldaý kórsetken Memleket basshymyz Qasym-Jomart Kemelulyna barsha Syr jurtshylyǵynyń atynan zor rızashylyǵymyzdy, shynaıy alǵysymyzdy bildiremiz. Respýblıkalyq mańyzy bar avtomobıl joly týraly másele Táýelsizdik alǵan kezeńnen beri birneshe márte kóterildi. Aýa raıynyń qolaısyzdyǵyna qaramastan, turǵyndarymyz qara jolmen Elordaǵa, Ulytaý, Qaraǵandy oblystaryna qatynady. Astanaǵa 2 myń shaqyrymnan astam jol júrip, Balqash arqyly da bardy.
Endi mine, Prezıdentimizdiń erekshe qoldaýynyń arqasynda qansha jyldan beri halqymyz kótergen ózekti másele óz sheshimin tapty. Oblys aýmaǵyndaǵy 216 shaqyrym jol tolyq qaıta jańǵyrtýdan ótip, tıisti jumystar aıaqtaldy. Jobany júzege asyrýǵa 84 mlrd teńge bólindi.
Burynǵy ótken babalardan qalǵan «Baq, qaıda barasyń, yntymaǵy jarasqan elge baramyn» degen jaqsy sóz bar. Árdaıym birligimiz bekem, yntymaǵymyz yrysty bolsyn! Júrgizýshiler men jolaýshylarǵa árdaıym aq jol, sát sapar tileımiz! Jańa jol berekeniń bastaýy bolǵaı, — dedi Nurlybek Mashbekuly.
Rásimde aýqymdy jobanyń júzege asýyna úles qosqan qurylysshylar men ınjenerlerge, jol salasynyń mamandaryna oblys ákiminiń Alǵys haty tabystaldy. «Qazavtojol» UK» AQ basqarma tóraǵasy Darhan Imanashev, oblystyq ardagerler keńesiniń tóraǵasy Serik Dúısenbaev quttyqtaý sóz sóıledi.
Negizi «Qyzylorda-Jezqazǵan» jolynyń ashylýy kelesi jylǵa josparlanǵan bolatyn. Halyqtyń suranysy eskerilip, merziminen buryn paıdalanýǵa berildi.
Buryn saparǵa shyqqandar eki aralyqta 20 saǵat jol júretin. Endi jańa jolǵa túsken jolaýshylar 16 saǵatta dittegen jerine barady. Jol tegis, sapasy joǵary, qaýipsizdik, jaılylyq eskerilgen.
Ulytaý oblysynyń aýmaǵynda bastalǵan qurylys jumystary aıaqtalyp, jańa jol paıdalanýǵa berilgende Astanaǵa baǵyt alǵan kólik 12 saǵatta jetetin bolady.
Búginde «Qyzylorda-Jezqazǵan» jolyn «Batys Eýropa-Batys Qytaı» avtodálizine qosatyn 25 shaqyrymdyq aınalma jol salatyn merdiger mekeme anyqtalyp jatyr. Jaqyn kúnderi qurylysy bastalady. Joba quny — 46 mlrd 3 mln teńge.
Respýblıkalyq mańyzy bar jol kólik qatynasyn edáýir jeńildetip, júk tasymalynyń tıimdiligin arttyrady. Jol boıynda zamanaýı servıstik qyzmet kórsetetin pýnktter boı kóterip, shaǵyn jáne orta bıznes jandanady. Aımaqtar arasyndaǵy áleýmettik-ekonomıkalyq ıntegratsııa nyǵaıa túsedi.