«Qyzylorda-Jezqazǵan» tas jolyn jóndeý jumysy qarqyndy júrip jatyr
Qos óńirdiń halqy úshin mańyzy zor «Qyzylorda-Jezqazǵan» tas jolyn jóndeý jumystary qarqyndy júrgizilip jatyr, dep habarlaıdy Kazinform.
Respýblıkalyq mańyzy bar jol kóp jyldan beri kúrmeýi sheshilmeı kelgen, halyqtyń arasynda biraz talqyǵa salynǵan máselelerdiń biri bolatyn. Memleket basshysy Qasym-Jomart Toqaev avtomobıl jolynyń qurylysyn merziminde bastaýdy, sapaly ári halyqqa qolaıly jaǵdaı jasaýdy tapsyrdy. Osy oraıda oblys ákimi Nurlybek Nálibaevtyń tikeleı qadaǵalaýymen respýblıkalyq mańyzy bar joldyń qurylysy qarqyndy júrip jatyr.
Búginde kúre joldyń qurylysy 40 paıyzǵa aıaqtalyp, 83 shaqyrym asfalt tóselgen.
«Syr óńirin elimizdiń ortalyq bóligimen jalǵaıtyn kúre joldyń jalpy uzyndyǵy – 424 shaqyrym. Al Qyzylorda oblysynyń aýmaǵyndaǵy uzyndyǵy – 216 shaqyrym. Joba quny – 108,5 mlrd teńge. Jyl sońyna deıin 104 shaqyrym joldy aıaqtaý kózdelip otyr», – deıdi oblystyq jolaýshylar kóligi jáne avtomobıl joldary basqarmasynyń basshysy Jánibek Syzdyqov.
Basqarma basshysynyń aıtýynsha, joba tolyqtaı aıaqtalsa Reseı Federatsııasyn Orta Azııa memleketterimen, elimizdiń ońtústik, soltústik jáne ortalyq aımaqtarymen baılanystyrýǵa múmkindik bermek. Sondaı-aq respýblıkalyq joldy jóndeý nátıjesinde, kólik aınalymy táýligine 1500 danadan 6000-ǵa deıin, al jolaýshylar sany 3000 adamnan 10 000-ǵa deıin, júk tasymaly kólemi 700 tonnadan 3000 tonnaǵa deıin artady. Budan bólek, Qyzylordadan Astana qalasyna deıingi jol júrý ýaqyty 6 saǵatqa qysqarady.
Aıta ketsek, oblysta «Batys Eýropa-Batys Qytaı» avtobany men «Qyzylorda-Jezqazǵan» joly respýblıkalyq statýsqa ıe. Al byltyr oblystaǵy joldyń ındıkatorlyq kórsetkishi 82 paıyz boldy. Búginde jol qurylysy aımaq kóleminde qarqyndy júrip jatyr.
Oblys ortalyǵy, aýdan men aýylaralyq joldardyń jańartýdan bólek, iri jol qurylystary da bar. Sonyń biri – kópshilik úshin kókeıkesti máselege aınalǵan «Qyzylorda-Jezqazǵan» avtojoly.
