Qyzylorda – Jezqazǵan avtojolynyń Qyzylorda oblysyndaǵy bóligi tolyq aıaqtaldy
ASTANA. KAZINFORM - «Qyzylorda – Jezqazǵan» avtomobıl jolyn rekonstrýktsııalaý jobasy eki óńir arasyndaǵy qaýipsiz ári úzdiksiz kólik qatynasyn qamtamasyz etý, joldyń kóliktik-paıdalaný jaǵdaıyn jaqsartý jáne óńiraralyq baılanysty damytý maqsatynda iske asyrylyp jatyr.
Jobanyń jalpy uzyndyǵy 400 shaqyrymdy quraıdy jáne eki kezeńnen turady: onyń 192 shaqyrymy Qyzylorda oblysynda, al 208 shaqyrymy Ulytaý oblysynda ornalasqan.
Qyzylorda oblysyndaǵy jumystar aıaqtaldy. Uzyndyǵy 192 shaqyrym bolatyn barlyq ýchaskelerde rekonstrýktsııalaý jumystary tolyq aıaqtalyp, búginde bul baǵytta avtokólik qozǵalysynyń qaýipsiz ári úzdiksiz ótýi qamtamasyz etildi. Bul – búkil joba aıasyndaǵy mańyzdy nátıjelerdiń biri.
Ulytaý oblysy baǵytynda da joba belsendi júzege asyrylý ústinde. Uzyndyǵy 208 shaqyrymdy quraıtyn, 8 rekonstrýktsııa ýchaskesine bólingen II sanatty jolda merdiger uıymdar barlyq resýrstardy tolyq jumyldyra otyryp, aýqymdy jumystar júrgizip jatyr. Qazirgi ýaqytta obektilerde shamamen 1150 jol mamandary men 685-ke jýyq jol-qurylys tehnıkasy jumyldyrylǵan, asfaltbeton jáne usaqtaý-suryptaý zaýyttary, beton aralastyrý qondyrǵylary jumys istep tur. Sondaı-aq, jumysshylarǵa arnalǵan vahtalyq qalashyqtar uıymdastyrylǵan.
Búginde Ulytaý oblysyndaǵy ýchaskeniń shamamen 200 shaqyrymy nemese jalpy uzyndyǵynyń 96% ýaqytsha aınalma joldar arqyly qozǵalysqa aýystyryldy. Bul negizgi joldy rekonstrýktsııalaý jumystaryn óńirler arasyndaǵy kólik qozǵalysyn toqtatpaı-aq júrgizýge múmkindik beredi. Kóptegen ýchaskelerde daıyndyq jáne jer jumystary tolyq aıaqtalyp, jol tóseminiń tómengi jáne joǵarǵy negiz qabattary tóseldi.
Qazirgi ýaqytta asfaltbeton jabynynyń qabattaryn tóseý qarqyndy jalǵasýda, al keıbir ýchaskelerde bul jumystar aıtarlyqtaı kólemde oryndalyp, aıaqtalýǵa jaqyn. Sonymen qatar kópirler men ondaǵan sý ótkizý qubyrlaryn ornatý jumystary qatar júrgizilip jatyr.
Joldy abattandyrý da qarqyndy túrde júzege asyp jatyr: jol belgileri, sıgnaldyq baǵanalar, tosqaýyl jáne torly qorshaýlar ornatylyp, jol tańbalary syzylýda, júrgizýshilerge arnalǵan demalys alańdary salynyp jatyr.
-Jol-qurylys materıaldaryn daıyndaý josparǵa sáıkes júrgizilip jatyr. Máselen, bıtým boıynsha jyldyq jospardyń 90%-dan astamy oryndaldy (7 758 tonnanyń shamamen 7 000 tonnasy daıyndalǵan). Sonymen qatar qıyrshyq tas, temirbeton buıymdary, qum-qıyrshyq tas qospasy jáne geotekstıl qory qajetti kólemde jınaqtalyp otyr,-delingen habarlamada.
Osylaısha, «Qyzylorda – Jezqazǵan» avtojolyn rekonstrýktsııalaý jobasy turaqty ári oń qarqynmen júzege asyrylyp keledi. Joba aıasynda barlyq baǵyttar boıynsha keshendi jumystar júrgizilip jatyr. Bul elimizdiń kólik ınfraqurylymyn damytýǵa, óńirler arasyndaǵy baılanysty nyǵaıtýǵa jáne uzyndyǵy 400 shaqyrym bolatyn mańyzdy kólik dálizin zamanaýı talaptarǵa saı jańǵyrtýǵa eleýli úles qosady.
Osyǵan deıin «Qaraǵandy – Jezqazǵan» tasjoly 2029 jylǵa deıin tolyq jańartylatyny týraly jazdyq.
