«Qyzylorda-Jezqazǵan» avtojolyn jańartý jumysy qashan aıaqtalady
ASTANA. KAZINFORM - Ulytaý oblysynda «Qyzylorda-Jezqazǵan» respýblıkalyq mańyzy bar avtojolynyń qurylysy boıynsha jınalys ótti, dep habarlaıdy QazAvtoJol baspasóz qyzmeti.
Jezqazǵan qalasynda ótken jıynǵa «QazAvtoJol» UK» AQ basqarma tóraǵasy Darhan Imanashev, oblysy ákimi Berik Ábdiǵalıuly jáne merdiger mekemelerdiń ókilderi qatysty.
Memleket basshysy Qasym-Jomart Toqaevtyń tapsyrmasyn oryndaý maqsatynda «QazAvtoJol» ulttyq kompanııasy uzyndyǵy 208 shaqyrymdy quraıtyn «Qyzylorda-Jezqazǵan» jobasyn oryndaýǵa kiristi.
«Jalpy uzyndyǵy 426 shaqyrymdy quraıtyn «Qyzylorda-Jezqazǵan» avtojolynyń qaıta jańartý jobasy Ulytaý jáne Qyzylorda oblystary arqyly ótedi. Ulytaý oblysy boıynsha qaıta jańartý jumystary aıasynda joldy ІІІ tehnıkalyq sanattan ІІ tehnıkalyq sanatqa aýystyrýdy josparlap otyrmyz. Azııa damý bankimen kelisimshartqa qol qoıǵanǵa deıin jer telimderimen jáne karerlerdi rásimdeý úshin aldyn ala merdiger mekemeler anyqtaldy», - dep habarlady «QazAvtoJol» basshysy.
Esterińizge sala keteıik, Qyzylorda oblysynda «Qyzylorda-Jezqazǵan» avtojolynyń 12-216 shaqyrymynda qaıta jańartý jumystary júrip jatyr. Ol ýchaskelerdiń jalpy uzyndyǵy 192 shaqyrymdy quraıdy, onyń 80 shaqyrymyna 2023 jyly asfaltbeton jabyny tóseldi. Qurylys nysandarynda qýattylyǵy 1,3 myń tonna/saǵ asatyn 7 asfaltbeton zaýyt, 824 jumysshy men 428 jol tehnıkasy jumyldyryldy.
Búgingi kúni Qyzylorda oblysynda jobanyń 43% jumysy oryndaldy (113 shaqyrym astyńǵy qabat, 100 shaqyrym negizgi qabat, 75 shaqyrym jol jabynynyń tómengi qabaty jáne 43 sýótkizgish qubyr salyndy). 2024 jyldyń sońyna deıin kórsetilgen 192 shaqyrymnyń 140 shaqyrymynda jol qozǵalysyn ashý jáne 2025-2026 jyldar aralyǵynda ýchaskelerde jumystardy kezeń-kezeńmen aıaqtaý josparlanyp otyr.
Ulytaý oblysy boıynsha «Qyzylorda-Jezqazǵan» avtojolynyń 216-424 shaqyrymy aralyǵyndaǵy ýchaskeni 2026 jyldyń sońynan qaraı aıaqtaý josparlanýda.
