Qyzylorda-Jezqazǵan avtojoly qashan paıdalanýǵa beriledi
JEZQAZǴAN. KAZINFORM — Ulytaý oblysynyń ákimi Dastan Ryspekov Qyzylorda-Jezqazǵan avtojoly qashan qoldanysqa beriletinin aıtty. Oblys aýmaǵy arqyly atalǵan avtojoldyń 208 shaqyrym ýchaskesi ótedi.
— Qazirgi ýaqytta qurylys jumystary júrip jatyr. Joldyń 1/4 bóligine asfalt jabyndysy tóseldi. Jobaǵa 530 tehnıka men myńnan astam jumysshy jumyldyrylǵan. Jobany jalpy júzege asyrý merzimi – 2025-2027 jyldar dep belgilengen. Keıbir ýchaskelerde kidirister bar, biraq «QazAvtoJol» tarapynan jumystardy jedeldetý boıynsha qajetti eskertýler jiberildi – dep jaýap berdi ákim tilshi suraǵyna Ortalyq kommýnıkatsııalar qyzmetinde.
Al Jezqazǵan-Qaraǵandy avtojolynyń 335 shaqyrymy oblys aýmaǵy arqyly ótedi. Qazirgi ýaqytta konkýrs jarııalanǵan jáne jyl sońyna deıin merdiger anyqtalady.
— Kelesi jyly qurylys jumystary «tolyq tapsyrý» shemasy boıynsha bastalyp, 2030 jylǵa deıin júrgiziledi. Sonymen qatar, bıyl «QazAvtoJol» kompanııasymen birlesip jolda ortasha jáne josparly jóndeý jumystaryn júrgizý úshin qosymsha qarajat bólýge múmkindik týdy. Shamamen 11 myń m² oıyqtardy jóndeý jáne 40 shaqyrym jóndeý jumystary atqaryldy, — dedi Dastan Ryspekov.
Jalpy Ulytaý oblysy qurylǵannan beri 549 shaqyrym avtomobıl joldary men 4 kópir jóndelgen.
Respýblıkalyq mańyzy bar «Qarajal–Atasý» avtojolynyń rekonstrýktsııasyna 1,7 mlrd teńge bólingen. «Ulytaý–Arqalyq» jolynyń 143–252 shaqyrymyna ortasha jóndeý jumystary júrgizilip jatyr. Oblystyq mańyzy bar «Sátbaev – Malshybaı – Joshyhan, Dombaýyl kesenesi» avtojolynyń qurylysy aıaqtalyp qaldy.
Buǵan deıin oblys ákimi Ulytaý oblysynda ortasha jalaqy 7,5%-ǵa óskenin aıtqan edi.
Sondaı-aq, Ulytaý oblysynyń bıýdjeti 30 mlrd teńgege artty.
Ulytaý oblysy áleýmettik azyq-túlik taýarlarynyń 4 túri boıynsha ózin-ózi qamtamasyz etedi.
Al Ulytaý tehnıkalyq ýnıversıtetiniń túlekteri Qazaqstan men AQSh dıplomdaryn alyp shyǵady.