Qyzylorda jáne Qaraǵandy oblystarynda kún stantsııalary men JEK iske qosyldy

ASTANA. KAZINFORM – Premer-mınıstr jáne Úkimet músheleriniń qatysýymen ótken AMANAT partııasy fraktsııasynyń keńeıtilgen otyrysynda Oljas Bektenov Prezıdenttiń negizgi tapsyrmalarynyń biri – jańa energetıkalyq qýat kózderin iske qosý ekenine nazar aýdartty.

Soǵan baılanysty Úkimet 2035 jylǵa deıin jalpy qýaty shamamen 26 GVt bolatyn jańa energııa kózderin iske qosý jumystaryn júrgizip jatyr.

– Búgingi kúni Qazaqstanda 233 energııa kóziniń 156-sy jańartylatyn qýat kózderine jatady. Bıyl jalpy qýaty 455,5 MVt bolatyn 9 jańartylatyn energııa nysandaryn iske qosý josparlanǵan. Jyl basynan beri Qyzylorda oblysynda jıyntyq qýaty 40 MVt quraıtyn 2 kún stantsııasy jáne Qaraǵandy oblysynda qýaty 50 MVt bolatyn jel elektr stantsııasy iske qosyldy, - dep atap ótti Oljas Bektenov.

Aıta keteıik, AMANAT partııasy fraktsııasynyń keńeıtilgen otyrysynda Premer-Mınıstr Oljas Bektenov Úkimet áleýmettik-ekonomıkalyq damý boljamyn jáne aldaǵy úsh jyldyq kezeńge arnalǵan respýblıkalyq bıýdjet jobasyn maquldap, Parlamentke engizgenin málimdedi.