Qyzylorda, Jambyl oblystarynda sý qoımalary salynyp jatyr

ASTANA. KAZINFORM – Táýelsizdik saraıynda Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmy ótip jatyr. Bul týraly Aqorda habarlady. 

— Memleket el ómirine qajetti asa mańyzdy ınfraqurylymdy jańǵyrtý úshin buryn-sońdy bolmaǵan aýqymdy sharalardy qolǵa aldy.

Sý — tirshilik kózi ekenin barshańyz jaqsy bilesizder. Qazaqstan jer kólemi jaǵynan iri memleket bolǵanymen, elimizde sý kózderi az, tipti, tapshy deýge bolady. Sondyqtan halyqqa sapaly aýyz sý berý, ekonomıka salalaryn sý resýrsymen qamtamasyz etý elimizdiń aldynda turǵan strategııalyq mańyzy bar mindetter sanalady, — dedi Prezıdent.

Byltyr Kendirlide sý tushytý zaýyty iske qosyldy, sonyń arqasynda Jańaózen qalasy turaqty aýyz sýmen qamtyldy. Bıyl kúzde Shardara sý qubyry jumys isteı bastaıdy, ıaǵnı qalanyń 30 myń turǵynyna taza aýyz sý beriledi.

— Jalpy, memleket elimizdegi búkil sý ınfraqurylymy júıesin damytý úshin naqty sharalar qabyldaýda. Atap aıtqanda, Túrkistan oblysyndaǵy Kóksaraı sý qoımasynda jańǵyrtý jumystary bastaldy, sondaı-aq Qyzylorda, Jambyl oblystarynda sý qoımalary salynyp jatyr. Aýyl sharýashylyǵyna orasan zor paıda ákeletin osy jobalar kelesi jyly aıaqtalyp, el kádesine jaraı bastamaq.

Bıyl sý sharýashylyǵy nysandaryn salý jáne jańǵyrtý jumystary boıynsha 220-dan astam joba júzege asyrylyp jatyr, — dedi Qasym-Jomart Toqaev. 

Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.