Qyzylorda ýnıversıteti «grantqa túsiremiz» degen habarlamany joqqa shyǵardy
QYZYLORDA. KAZINFORM — Áleýmettik jelide «Qorqyt ata atyndaǵy Qyzylorda ýnıversıtetine qosymsha rektor grantyna nemese bosaǵan bilim granttaryna oqýǵa túsirip beremiz» degen mazmundaǵy túrli jarnamalar men habarlamalar tarady.
Ýnıversıtet ákimshiligi munyń shyndyqqa janaspaıtynyn málimdedi.
— Talapkerler men olardyń ata-analaryn tek Qorqyt ata atyndaǵy Qyzylorda ýnıversıtetiniń resmı aqparat kózderi men áleýmettik jelidegi resmı paraqshalarynda jarııalanǵan málimetke ǵana senýge shaqyramyz. Joǵary oqý oryndaryna qabyldaý Ǵylym jáne joǵary bilim mınıstrligi bekitken qoldanystaǵy qaǵıdalarǵa sáıkes júzege asyrylady. Ýnıversıtetke qabyldaý úderisi zańnama talaptaryna saı ashyq ári resmı tártippen júrgiziledi, — delingen habarlamada.
Eske salaıyq, elimizde 123 joǵary oqý orny bar, onyń 107-si — azamattyq ýnıversıtet.
