Qyzylorda turǵynyna kúlgeni úshin aıyppul salynǵany ras pa
QYZYLORDA. KAZINFORM – Áleýmettik jelide Qyzylorda qalasynda polıtsııa qyzmetkerleri azamatshany kúlgeni úshin jaýapkershilikke tartqany týraly beınejazba tarady. Oblystyq polıtsııa departamenti aqparattyń shyndyqqa sáıkes kelmeıtinin málimdedi.
Anyqtalǵandaı, oqıǵa túngi saǵat 1 shamasynda bolǵan.
- Qyzmet atqaryp júrgen polıtsııa qyzmetkerleri terezesi ashyq turǵan kólikke nazar aýdarǵan. Kóliktiń ishinde mýzyka qatty oınap, ondaǵy qyzdar daýystap aıǵaılaǵan. Osylaısha túngi ýaqytta tynyshtyq saqtamaǵan. Polıtsııa qyzmetkerleri avtokólikke jaqyndap, qujattardy tekserip, júrgizýshige ózderiniń ne sebepti kelgenin sabyrmen túsindirgen. Qyzmetkerler aýyzsha eskertýmen shektelip, keıin turǵyndy jibergen. Oǵan eshqandaı aıyppul salynǵan joq jáne ákimshilik jaýapkershilikke tartylmady. Soǵan qaramastan azamat polıtsııa qyzmetkerlerimen sóılesý barysynda emotsııaǵa berilip, daýsyn kótergen jáne bolǵan jaǵdaıdy beınetaspaǵa túsirgen. Keıin oqıǵany áleýmettik jelide burmalap jarııalaǵan, - delingen habarlamada.
Oqıǵanyń mán-jaıy polıtsııa qyzmetkerleriniń jetonyna jazylǵan. Departament beınejazba tekserilip, polıtsııa qyzmetkerleriniń áreketinen zańbuzýshylyq anyqtalmaǵanyn atap ótti.
Al jýyrda polıtsııa qyzmetkerleri TikTok áleýmettik jelisindegi tikeleı efır barysynda birneshe ret balaǵat sózder aıtqan Qyzylorda oblysy Syrdarııa aýdanynyń 36 jastaǵy turǵyny Qýanysh Oljabaevty anyqtady.
