Qyzylorda turǵyny jalǵan aqparat taratqany úshin qamaldy
ASTANA. KAZINFORM — Qyzylorda turǵyny jalǵan aqparat taratyp, polıtsııa qyzmetkerlerine qurmetsizdik tanytqan.
Qyzylorda qalasynyń 22 jastaǵy turǵyny Shuǵyla Sábıt túngi ýaqytta tynyshtyqty buzyp, polıtsııa qyzmetkerleriniń zańdy talaptaryna baǵynbaı, usaq buzaqylyq jasaǵany jáne jalǵan aqparat taratqany úshin jaýapkershilikke tartyldy.
Sot sheshimimen qyz ákimshilik qamaýǵa alyndy. Sonymen qatar oǵan ákimshilik aıyppuldar salyndy jáne resmı eskertý berildi.
Qabyldanǵan sharalardan keıin qyz áleýmettik jelilerdegi tıisti jarııalanymdaryn óshirdi.
Eske salaıyq, buǵan deıin atalǵan qyz áleýmettik jelilerde ózin «kúlgeni úshin» jaýapkershilikke tartty degen jalǵan aqparat taratyp, bılik ókilderine qurmetsizdik tanytqan.
Aıta ketelik polıtsııa formasyn kıip, ádepsiz bı bılegen bloger jaýapqa tartylǵan edi.
