Qyzylorda turǵyny zańsyz oıyn bıznesinen túsken aqshaǵa kólik satyp alǵan

QYZYLORDA. KAZINFORM — Qyzylorda oblystyq ekonomıkalyq tergep-tekserý departamenti zańsyz oıyn bıznesin uıymdastyrǵan Qyzylorda qalasynyń turǵynyna qatysty qylmystyq isti tergedi. 

Departamenttiń málimetinshe, tergeý barysynda kúdiktiniń qylmystyq jolmen tapqan qarajatqa GAZ-4301 markaly avtokólik satyp alǵany anyqtaldy. Biraq qylmysyn jasyrmaq bolyp ony jaqyn tanysynyń atyna tirkep, zańdastyrǵan. Bul derekter bir qylmystyq iske qosa biriktirilip, sot úkimimen kúdiktiniń bos bostandyǵy 2,5 jylǵa shekteldi. Al qylmystyq jolmen alynǵan kólikti tárkileıtin boldy.

Bıyl 7 aıda atalǵan vedomstvonyń óndirisinde 37 qylmystyq is bolsa, onyń 32-si aýyr sanatty. Aıaqtalǵan isterdiń úlesi — 79%. Memleketke 784 mln teńgeden astam zalal keltirilse, sonyń 248,6 mln teńgesi tikeleı qarjylaı, al múlikke tyıym salý sharalaryn qosa alǵanda 549,7 mln teńgesi óndirildi.

Buǵan deıin habarlaǵanymyzdaı, Qarmaqshy aýdanyndaǵy № 99 orta mekteptiń esepshisi 2022-2024 jyldar aralyǵynda artyq avanstyq tólemdi óziniń jáne 6 sybaılas muǵalimniń esepshotyna júıeli túrde negizsiz aýdaryp otyrǵan.