Qyzylorda turǵyny vıtse-premerden Temirbek Júrgenov týraly telehıkaıa túsirýdi surady
ASTANA. KAZINFORM - QR Premer-Mınıstriniń orynbasary Tamara Dúısenova AMANAT partııasynyń qoǵamdyq qabyldaýy alańynda azamattardy onlaın qabyldady, dep habarlaıdy Úkimettiń baspasóz qyzmeti.
Júzdesý barysynda Qyzylorda turǵyny Sábı Ańsat tarıhı tulǵalar eńbegin jastar arasynda dáripteýge baılanysty másele kóterdi. Onyń ishinde Temirbek Júrgenov týraly telehıkaıa túsirý kerektigin jetkizdi. Bul rette Tamara Dúısenova Mádenıet jáne aqparat mınıstrligine tıisti tapsyrma berip, oryndalýyn jeke baqylaýyna alatynyn aıtty.
Astana turǵyny adam aǵzasyna zııandy temeki, alkogol ónimderi men quramynda qanty bar sýsyndardyń taralýyna qarsy kúres sharalaryn kúsheıtýdi surady. Máselege qatysty jaýap alǵan vıtse-premer bul baǵytta júıeli jumys atqarylyp jatqanyn atap ótti. Sonymen qatar salamatty ómir saltyn nyǵaıtýǵa jáne nasıhattaýǵa baǵyttalǵan birlesken sharalardy qoldaýǵa daıyn ekenin bildirdi.
Qabyldaýǵa qatysqan bir top azamat quqyq qorǵaý qyzmetiniń ardagerleri atynan ótinish aıtty. Olar Almatydaǵy ІІM aýrýhanasy men onyń qaramaǵyndaǵy «Qazaqstan» shıpajaıynyń jumysyn qalypqa keltirýdi surady. Kezdesý barysynda bul máselemen Іshki ister mınıstrligi men megapolıs ákimdigi birlese shara qabyldap jatqany týraly aıtyldy. Tamara Dúısenova vedomstvo basshysynyń orynbasaryna másele kótergen sala ardagerlerimen tikeleı kezdesip, máseleni sheshý barysy týraly turaqty túrde qulaǵdar etip otyrýdy tapsyrdy.
Semeı turǵyny múgedektigi bar balany dári-dármek, arnaıy taǵammen qamtý máselesin kóterse, astanalyq azamat «Bolashaq» baǵdarlamasy arqyly bilim alǵan túlektiń jaıyn qozǵady. Tamara Dúısenova aıtylǵan máselelerdi sheshýge baılanysty múddeli memlekettik organdarǵa naqty tapsyrma júktep, atqarylǵan sharalar týraly tikeleı esep berýin mindettedi.
Sondaı-aq 1 shildeden bastap engiziletin dárilik zattardy tańbalaý men qozǵalysyn baqylaý talabyn engizý máselesi talqylandy. Vıtse-premer atalǵan shara eń aldymen turǵyndar tutynatyn dári-dármektiń sapaly ári taza bolýyna baǵyttalǵanyna basa mán berdi. Tańbalaý men baqylaý aınalymǵa kontrafaktilik ónimniń enýine jol bermeıtinin atap ótti.
Sonymen qatar Tamara Dúısenova tıisti tańbalar tek 1 shildeden keıin óndirilgen nemese elge ákelingen dárilik zattarǵa qoıylatynyn jetkizdi. Kezdesý kezinde kóterilgen máseleler boıynsha múddeli memlekettik organdar, dári-dármek óndirýshileri, tasymaldaýshylar, dárihanalar ókilderiniń qatysýymen turaqty túrde júzdesýler uıymdastyrý tapsyryldy.
