Qyzylorda turǵyny polıtsııaǵa habarlasyp, burynǵy jumys ornynda bomba bar ekenin aıtqan

 Qyzylorda oblysynda mas erkek burynǵy jumys ornyna jarylǵysh zat qoıylǵanyn aıtyp, jalǵan habar bergen. Sot onyń bas bostandyǵyn shektedi, dep habarlaıdy Kazinform.

Qyzylorda qalasynyń turǵyny telefon arqyly Tasbóget kentinde ornalasqan medıtsınalyq mekemege jarylǵysh zat qoıylǵanyn habarlaǵan.

Ǵımaratty jarý-tehnık mamandary teksergen.

Onda jarylǵysh zat tabylǵan joq. 

«Qyzylorda oblysy polıtsııa departamenti ekstremızmge qarsy is-qımyl basqarmasynyń qyzmetkerleri júrgizgen jedel izdestirý sharasynyń nátıjesinde jalǵan habar bergen adam anyqtaldy. Ol mekemeniń burynǵy qyzmetkeri bolyp shyqty. Qyzylorda qalasynda turatyn 47 jastaǵy azamatqa qatysty QR Qylmystyq kodeksiniń 273-baby boıynsha sotqa deıingi tergeý júrdi. Jalǵan habar bergen azamat qyzmetinen bosap qalýyna baılanysty ashýǵa berilip, mas kúıinde polıtsııaǵa qońyraý shalǵan. Qyzylorda qalalyq sotynyń úkimimen oǵan bir jyl merzimge bas bostandyǵynan shekteý jazasy taǵaıyndaldy», — dep málim etti Qyzylorda oblystyq polıtsııa departamentinen.

Eske salsaq, budan buryn Qyzylordada qala ortasynda tapanshamen júrgen turǵyn ustalǵan edi.