Qyzylorda turǵyny qydyryp, ishimdik ishý úshin elektrondy baqylaý bilezigin syndyrǵan
QYZYLORDA. KAZINFORM — Probatsııa qyzmetiniń talaptaryn birneshe ret buzǵan Qyzylorda turǵyny elektrondy baqylaý bilezigin ádeıi syndyryp, probatsııalyq baqylaýdan jaltarmaq bolǵan.
Oblystyq qylmystyq atqarý júıesi departamentiniń málimetinshe, ol úsh aı buryn qalalyq probatsııa qyzmetiniń esebine alynyp, aıaǵyna elektrondy baqylaý bilezigi taǵylǵan.
— Sot júktegen mindettermen tanysyp, jazany óteý tártibin saqtaýǵa tıisti. Probatsııa qyzmetkerleri turaqty túrde profılaktıkalyq jumys júrgizgen. Alaıda sottalǵan azamat belgilengen talaptardy oryndamaı, jazany óteý tártibin birneshe ret buzǵan. Osyǵan baılanysty oǵan eskertý jasalǵan. Jýyrda ishimdik iship, qydyrmaq bolyp elektrondy bilezikti ádeıi syndyryp, úıine tastap ketken. Osylaısha probatsııalyq baqylaý talabyn óreskel buzyp, baqylaýdan tys qalýǵa tyrysqan, — delingen habarlamada.
Baqylaý quralyn ádeıi búldirý jazany óteý tártibin buzý retinde qaralady. Qazirgi kúni zańǵa baǵynbaǵan azamatqa qatysty qujattar sotqa joldaý úshin jınaqtalyp jatyr.
Buǵan deıin Astana prokýratýrasy probatsııalyq baqylaýdan ótetin azamattarǵa qoıylatyn talaptar men ony buzǵan jaǵdaıda týyndaıtyn jaýapkershilikti túsindirdi.
