Qyzylorda turǵyny kafede daıashy men ákimshini soqqyǵa jyqqan

QYZYLORDA. KAZINFORM — Qyzylorda qalasynda kafede daıashy men kafe ákimshisine soqqy jumsaǵan adamnyń bas bostandyǵy shekteldi.

Bul qylmystyq is Qyzylorda qalasynyń № 2 sotynda qaraldy. Ol boıynsha QR Qylmystyq kodeksiniń 293-baby 1-bóligimen is qozǵaldy.

Sottalýshy A. tańǵy saǵat 4:30 shamasynda kafede jalǵyz ózi kóńil kóterip otyrǵan. 

Sol kezde daıashy Z. men ákimshi A. kafeniń jabylatynyn aıtyp eskertken.

«Sol sátte ol sebepsizden sebepsiz balaǵat sózder aıtqan. Kafeden shyqpaıtynyn aıtyp, dóreki minez kórsetken. Mas kúıinde qolyndaǵy syra ishimdiginiń ydysyn syndyrǵan. Sodan keıin daıashy Z-nyń shashynan julyp, aıaǵynan birneshe márte tepken. Saldarynan daıashyǵa dene jaraqatyn salǵan. Al ákimshi qyzmetin atqaratyn jábirlenýshi A-nyń kózine eki márte soqqy jasaǵan», — dep málim etti Qyzylorda qalasynyń № 2 sotynan.

Sot úkimimen sottalýshy A-ǵa 1 jyl merzimge bas bostandyǵyn shekteý jazasy taǵaıyndalyp, barlyq merzimge probatsııalyq baqylaý belgilengen.