Qyzylorda turǵyndaryn shoshytqan oqıǵa: Itter men mysyqtar qasaqana ýlanǵan bolýy múmkin

QYZYLORDA. KAZINFORM — Búgin Instagram áleýmettik jelisinde Qyzylorda qalasyndaǵy úılerdiń biriniń aýlasynda 20-dan astam ıt pen mysyqtyń óli kúıinde tabylǵany týraly beınejazba tarady.

— Tájibaev kóshesindegi 23-úıdiń aýlasynda 20 shaqty ıt pen mysyq ýlanyp ólgen. Bul kezdeısoqtyq emes. Mundaı qadamǵa sanaly túrde barǵan. Barlyq mysyq zalalsyzdandyrylǵan, eshkimge zııany joq bolatyn. Olardy Olga tamaqtandyryp júretin. Kóbiniń kútimi bar, tipti keıbiri tipti qolǵa úıretilgen edi, — delingen vıdeoda. 

Jazba avtory jaǵdaıdy kóre tura habarlamaǵan úı turǵyndaryn da osy iske qatysýshylar dep esepteıtinin aıtqan.

— Muny kim istegenin biletinder bolsa, jazyp qaldyrsynshy. Habarlamanyń qupııa bolatynyna kepildik beremin, — dedi vıdeo avtory.

Buǵan baılanysty oblystyq polıtsııa departamentinen resmı jaýap aldyq. 

— Polıtsııa tarapynan janýarlarǵa qatygezdik kórsetý deregi boıynsha qylmystyq is qozǵaldy. Oqıǵanyń barlyq mán-jaıyn anyqtaý maqsatynda tergeý sharalary júrgizilip jatyr. Іs departamenttiń baqylaýynda, — delingen vedomstvo habarlamasynda.

Buǵan deıin Instagram áleýmettik jelisinde Qyzylorda qalasynda júrip kele jatqan kólikte ersi qylyq kórsetip trend túsirgen jastardyń vıdeosy tarap, polıtsııa túsinikteme bergen bolatyn.