Qyzylorda turǵyndary jasóspirimniń óliminen keıin ortalyq alańdaǵy qaýipsizdik máselesin qaıta kóterdi
QYZYLORDA. KAZINFORM – Turǵyndar ortalyq alańdaǵy oıynshyq kólikterdi jalǵa berý qyzmeti men ondaǵy tártipke qatysty alańdaýshylyq bildirip otyr.
Marqum qala mektepteriniń birinde 9-synypta oqyǵan. Instagram áleýmettik jelisinde jarııalanǵan anasynyń jazbasyna súıensek, uly bos ýaqytynda oǵan ortalyq alańda oıynshyq kólikterdi jalǵa berý arqyly tabys tabýǵa járdemdesken. Aıtýynsha, 21 qazan kúni keshkilik eki kásipkerge jaldanyp jumys isteıtin balalar arasynda klıentke talas paıda bolǵan. Kelispeýshilik kezinde qarsy taraptaǵy balalardyń biri munyń júrek tusyna buraǵysh tyǵyp alǵan. Jasóspirim aýrýhanaǵa jetkizilgenimen dárigerler onyń ómirin saqtap qala almapty.
Qaıǵyly jaǵdaıdan keıin áleýmettik jeli qoldanýshylary ortalyq alańdaǵy qaýipsizdik máselesine mán berdi. Turǵyndardyń aıtýynsha, oıynshyq kólikterdi jalǵa berý qyzmeti men serýenge arnalǵan kólikterdiń qozǵalysy jaıaý júrginshilerge qolaısyzdyq týǵyzady.
- Qyzylordanyń ortalyq alańy halyqtyń alańsyz demalatyn orny ma álde jalǵa beriletin oıynshyq mashınalar men serýen kólikteriniń jarys alańy ma? Balalar men úlkender jan-jaǵyna jaltaqtap, kólik qaǵyp ketpesin dep saqtanyp júrýge májbúr. Bul týraly áleýmettik jelide turǵyndar talaı shaǵymdandy. Jaqynda osy alańdaǵy janjal saldarynan 14 jastaǵy jasóspirimniń qaza tabýy – úlken qasiret. Ortalyq alań – kásipkerlerdiń jeke menshigi emes, halyq demalatyn qoǵamdyq oryn, - delingen Instagram áleýmettik jelisindegi Krıtıka Qyzylorda paraqshasynda.
Ortalyq alań turǵyndardyń demalýyna arnalǵandyqtan ondaǵy qyzmet túrleri qaýipsizdik talaptaryna saı uıymdastyrylýy kerek. Kelýshilerdiń basty talaby – osy.
Qyzylorda qalalyq polıtsııa basqarmasy búginde aýmaq tolyq baqylaýǵa alynǵanyn atap ótti.
- Qyzylorda qalasynyń aýmaǵynda ýchaskelik polıtsııa ınspektorlary tarapynan zańsyz saýda-sattyqpen aınalysqan tulǵalardy anyqtaý jáne jolyn kesý baǵytynda tıisti jumys atqarylyp keledi. Nátıjesinde Qazaqstan Respýblıkasynyń Ákimshilik quqyq buzýshylyq týraly kodeksiniń 204-baby boıynsha jyl basynan beri 136 ákimshilik hattama rásimdeldi, - delingen habarlamada.
Eske salaıyq, buǵan deıin kámeletke tolmaǵannyń abaısyzda ólimine ákep soqqan qasaqana aýyr dene jaraqatyn keltirý deregi boıynsha qylmystyq is qozǵaldy. Kámeletke tolmaǵan kúdikti oblystyq kámeletke tolmaǵandardy beıimdeý ortalyǵyna ornalastyryldy.
