Qyzylorda turǵyndary túzeý mekemesine aqsha kirgizbek bolǵan
QYZYLORDA. KAZINFORM — Qyzylorda oblystyq qylmystyq atqarý júıesi departamentiniń qyzmetkerleri departamentke qarasty № 68 mekemege tyıym salynǵan zattardy ótkizý áreketiniń jolyn kesti.
Departamenttiń baspasóz qyzmeti habarlaǵandaı, qamaýda otyrǵan aǵasyna sálem-saýqat ákelgen turǵyn jasyryn túrde aqsha ótkizbek bolǵan.
— Tekserý barysynda jetkizilgen sporttyq kıimniń oń jaq qaltasynan jalpy somasy 30 myń teńge tabyldy. Atalǵan derek boıynsha sálem-saýqat ıesine qatysty Ákimshilik quqyqbuzýshylyq týraly kodekstiń 481-babynyń 1-bóligine sáıkes ákimshilik materıaldar jınaqtalyp, sot qaraýyna joldandy, — delingen habarlamada.
Jýyrda dál osyndaı taǵy bir oqıǵa tirkeldi. Qamaýda otyrǵan ákesine sálemdeme ákelgen azamatsha 10 myń teńge shamasynda aqsha kirgizbek bolǵan. Muny mekeme qyzmetkerleri baqylap-ótkizý pýnktinde ornatylǵan rentgen qondyrǵysy arqyly anyqtap, tárkiledi.
Azamatshaǵa qatysty jınalǵan materıaldar protsessýaldyq sheshim qabyldaý úshin qalalyq ákimshilik sotqa joldandy.
Buǵan deıin biz bıyl 15 myń sottalǵan adam qylmystyq raqymshylyqpen qamtylýy múmkin ekenin jazǵan edik.
