Qyzylorda turǵyndary medıtsınalyq qyzmet sapasyna jıi shaǵymdanǵan
QYZYLORDA. KAZINFORM – Bıyl 5 aıda Áleýmettik medıtsınalyq saqtandyrý qoryna keri baılanys arnalary arqyly Qyzylorda oblysynyń turǵyndarynan medıtsınalyq qyzmet alý boıynsha 675 ótinish túsken.
Qordyń Qyzylorda oblystyq fılıaly habarlaǵandaı, onyń ishinde patsıentterdiń alǵysy, shaǵym, usynystary bar.
- Ótinishterdiń basym bóligi keńes berý sıpatynda boldy. Azamattardy MÁMS jarnalaryn tóleý tártibi, medıtsınalyq qyzmet, dári-dármekpen qamtamasyz etý, joldamalar men eńbekke ýaqytsha jaramsyzdyq paraqtaryn rásimdeý, sondaı-aq medıtsınalyq kómek kórsetý sharttary, jeńildik sanattary men tizimdegi ózgerister qyzyqtyrǵan. 2026 jyldyń 5 aıynyń qorytyndysy boıynsha qor júıesine barlyǵy 238 shaǵym túsken. Bul 2025 jyldyń sáıkes kezeńimen salystyrǵanda 95 shaǵymǵa nemese 28,5% az. Aldyńǵy kezeńmen salystyrǵanda qaıtaryp alynǵan shaǵymdardyń úlesi 57,36% -dan 65,13%-ǵa deıin ósti. Atap aıtqanda, 238 shaǵymnyń 155-i (65,13%) patsıentterdi qoldaý qyzmeti men medıtsınalyq uıymdardyń ishki saraptama bólimderi arqyly «osy jerde jáne dál qazir» qaǵıdaty boıynsha qaıtaryp alynǵan nemese sheshimin tapqan, - delingen habarlamada.
Qyzylordalyqtardyń ne másele boıynsha kóp shaǵymdanǵany belgili boldy. Onyń ishinde medıtsınalyq kómektiń sapasyz kórsetilýi jóninde 87 (36,55%), medıtsınalyq kómek kórsetýden bas tartý týraly 77 (32,35%), TMKKK jáne MÁMS sheńberinde dárilik zattardy berýden bas tartýǵa qatysty 24 (10,08%) shaǵym tirkelgen.
Aıta keteıik, oblysta saqtandyrylmaǵan adamdar sany 113,5 myńnan asady, bul – 13,9%.
