Qyzylorda teatrynyń kezekti maýsymy ashyldy
QYZYLORDA. KAZINFORM — Nartaı Bekejanov atyndaǵy Qyzylorda oblystyq qazaq akademııalyq mýzykalyq drama teatry 72-shi teatr maýsymyn saltanatty túrde ashty.
Jańa maýsymnyń shymyldyǵy álem ádebıetiniń kórnekti ókilderiniń biri, áıgili jazýshy Ken Kızıdiń «Kókektiń uıasy» romanynyń jelisi boıynsha sahnalanǵan «Ký-Ký» tragıkomedııasynyń premerasymen túrildi.
— «Ký-Ký» tragıkomedııasy adam erkindigi, qoǵam men tulǵa arasyndaǵy qaıshylyqtar, adamgershilik qundylyqtar men ómirdiń máni sekildi ózekti taqyryptardy arqaý etken tereń fılosofııalyq týyndy retinde kórermenge jol tartty. Qoıylymnyń rejısserlik sheshimi, akterlerdiń shynaıy oıyny, sahnalyq bezendirilýi men mýzykalyq kórkemdelýi kórermen kóńilinen shyǵyp, erekshe áser syılady. Premera barysynda teatr artısteri joǵary kásibı deńgeıin kórsetip, kórermendi qoıylymnyń oqıǵasyna tereń boılata bildi, — delingen teatr habarlamasynda.
72-shi teatr maýsymynyń ashylýy óner ujymy úshin ǵana emes, óńirdiń mádenı ómirindegi mańyzdy oqıǵalardyń biri boldy.
Eske salaıyq, Qalıbek Qýanyshbaev atyndaǵy Qazaq ulttyq mýzykalyq drama teatry 36-maýsymynyń shymyldyǵyn Muhtar Áýezovtiń «Qaragóz» tragedııasymen ashty.
