Qyzylorda soty jaza óteý tártibin buzǵan 11 adamdy bas bostandyǵynan aıyrdy
QYZYLORDA. KAZINFORM — Qyzylorda qalalyq probatsııa qyzmetiniń esebinde 500-ge jýyq sottalǵan adam tur.
Oblystyq qylmystyq atqarý júıesi departamentiniń baspasóz qyzmeti habarlaǵandaı, jyl basynan beri jaza óteý talabyn oryndamaǵan, otbasynda tynyshtyqty buzyp, birneshe ret berilgen eskertýge qulaq aspaǵan 11 adamnyń bas bostandyǵyn shekteý jazasy bas bostandyǵynan aıyrý jazasyna aýystyryldy.
— Solardyń qataryna búgin taǵy bir adam qosyldy. Esepte turatyn oǵan 3 jyl merzimge bas bostandyǵyn shekteý jazasy taǵaıyndalǵan. Sonymen qatar 100 saǵat májbúrli eńbek mindettelip, probatsııa qyzmetiniń esebine alynǵan. Alaıda probatsııa qyzmetine ýaqytyly tirkelmeı, jaza óteýden jaltaryp, májbúrli eńbekti oryndaýdan bas tartqan. Іshimdikke salynyp, otbasynyń berekesin alǵan. Osyǵan baılanysty probatsııa qyzmeti sottan onyń bas bostandyǵyn shekteý jazasyn qatań jazaǵa, ıaǵnı bas bostandyǵynan aıyrýǵa aýystyrýdy suraǵan. Sot usynysty qanaǵattandyrdy. Endi ol jazasynyń ótelmegen bóligin, ıaǵnı 2 jyl 6 aı merzimdi túzeý mekemesinde óteıdi, — delingen habarlamada.
Budan buryn Qostanaı oblysyndaǵy túzeý mekemesinde jazasyn óteýshi kóz jumǵanyn, oqıǵaǵa baılanysty tergeý bastalǵanyn habarlaǵan edik.
