Qyzylorda soty oqýshyny jezókshelikke tartý boıynsha appelıatsııalyq satydaǵy isti qarady

QYZYLORDA. KAZINFORM - Qyzylorda oblystyq soty kámelet jasyna tolmaǵan jábirlenýshini azaptaý, jezókshelikpen aınalysýǵa tartý faktileri boıynsha appelıatsııalyq satydaǵy isti qarady. Bul týraly oblystyq sottyń baspasóz qyzmeti habarlady.

Qylmystyq is qorǵaýshy jaqtyń apellıatsııalyq satyǵa sottalǵandardy jartylaı aqtaýdy jáne jazany tómendetýdi suraǵan shaǵymdarymen kelip túsken. Nátıjesinde sot kámeletke tolmaǵandardyń isteri jónindegi mamandandyrylǵan aýdanaralyq sottyń sottalǵandarǵa qatysty sot úkimin ózgerissiz qaldyrdy.

- Sot úkimimen kámeletke tolmaǵandar M.N., A.J., Q.D. qylmystyq kodekstiń 134-baby 3-bóligimen, 1, 2-tarmaqtarymen (kámeletke tolmaǵandy jezókshelikpen aınalysýǵa tartý), QK-niń 194-baby 3-tarmaǵy 2-tarmaqshasymen (iri mólsherde paıda tabý maqsatynda qorqytyp alý), QK-niń 110-baby 2-tarmaǵy 1-tarmaqshasymen (kórineý kámeletke tolmaǵan adamǵa qatysty azaptaý) kináli dep tanylyp, qylmystyq quqyqbuzýshylyqtar jıyntyǵy boıynsha árqaısysyna 6 jyl 8 aı bas bostandyǵynan aıyrý túrindegi jaza taǵaıyndalǵan. 

B.A. QK-niń 194-baby 2-bóligin 2-tarmaqshasy boıynsha kináli dep tanylyp, oǵan 4 jyl 8 aı bas bostandyǵynan aıyrý jazasy taǵaıyndalǵan. 

T.U. jáne Q.A. QK-niń 28-babynyń 5-bóligi, 194-baby, 2-bóligi 1, 2-tarmaqshasy boıynsha kináli dep tanylyp, árqaısysyna 4 jyl 8 aı bas bostandyǵynan aıyrý jazasy taǵaıyndalǵan.

T.A., B.A. jáne T.D. QK-niń 134-baby 3-bóligi 1-tarmaǵy jáne QK-niń 194-baby 2-bóligi 2-tarmaǵy boıynsha kináli dep tanylyp, qylmystyq quqyq buzýshylyqtardyń jıyntyǵy boıynsha olardyń árqaısysyna 7 jyl 6 aı bas bostandyǵynan aıyrý túrindegi jaza taǵaıyndalǵan.

QPK-niń 29-babynyń talaptaryna sáıkes, bul is jabyq sot otyrysynda qaraldy.

Sot alqasy birinshi satydaǵy sot úkimmen kelesi negizderge sáıkes kelisedi:

1. Sot istiń mán-jaıyn durys anyqtaǵan. 

2. Sottalǵandardyń kinási sotta zerttelgen dálelder, jábirlenýshi jáne kýálardyń aıǵaqtary, sot saraptamalarynyń qorytyndysy arqyly tolyq rastalǵan. 

3. Jábirlenýshi jaqtyń azamattyq talap qoıýy durys sheshilgen.

4. Sottalǵandarǵa jaza qylmystyq zań baptarynyń sanktsııasy sheginde, jasalǵan quqyqbuzýshylyqtyń qoǵamdyq qaýiptilik sıpaty men dárejesi, jasaǵan áreketterine sáıkes, olardyń jeke basy, qylmys jasaýdaǵy ár qaısysynyń róli, qylmystyq jazany jeńildetetin jáne aýyrlatatyn mán-jaılar eskerilip, sottalǵandardyń túzelýine qajetti jáne jetkilikti taǵaıyndalǵan. 

5. Sot alqasy úkimdi buzýǵa nemese ózgertýge negiz bola alatyn materıaldyq jáne protsessýaldyq zań talaptaryn buzý deregin anyqtamady, - delingen habarlamada. 

Sot úkimi zańdy kúshine endi. 

Aıta keteıik, 3 sáýir kúni Qyzylordada 16 jastaǵy qyzdy synyptastary seksýaldy quldyqta ustaǵan oqıǵaǵa qatysty 9 adamǵa sot úkimi shyqty. 

Al odan buryn, 2024 jyly 11 qarashada Qyzylorda qalasynyń №2 sotynda aıyptalýshyǵa qatysty QR QK 194-baby 2-bóliginiń 1-tarmaǵy boıynsha (qorqytý) qylmystyq is qaraldy. 

Biz buryn Qyzylordada synyptasyn jezókshelikpen aınalysýǵa májbúrlegen oqýshylar kúdikke ilingenin jazǵan bolatynbyz. 

Artynsha Qyzylordada keleńsizdikke jol bergender qyzmetinen ketti. 

Keıin QR ІІM jábirlenýshi turatyn aýmaqty táýlik boıy kúzetti. 

Ǵanı Beısembaev oqýshyny jezókshelikke májbúrleý daýyna qatysty pikir bildirdi.

Tergeý júrip jatqanda Qyzylordada oqýshyny jezókshelikke májbúrlegen 8 kúdikti qamaldy.

Keıinirek oqýshyny jezókshelikke májbúrleýge qatysty 13 adam anyqtaldy.