«Qyzylorda – Sekseýil» joly halyqaralyq standartqa saı qaıta jańartylady
ASTANA. KAZINFORM — «Qyzylorda – Sekseýil» avtojolyn damytý jóninde memorandýmǵa qol qoıyldy.
Respýblıkalyq mańyzy bar «Qyzylorda – Sekseýil» avtomobıl jolyn qaıta jańartý jobasyn iske asyrý aıasynda QazAvtoJol men Islam damý banki arasynda ózara túsinistik týraly memorandýmǵa qol qoıyldy.
Memorandýmǵa qol qoıý kólik ınfraqurylymyn damytý salasyndaǵy halyqaralyq yntymaqtastyqty nyǵaıtýǵa jáne strategııalyq mańyzy bar jol jobalaryn iske asyrýǵa halyqaralyq qarjy ınstıtýttaryn tartýǵa baǵyttalǵan kezekti qadam boldy.
Joba aıasynda uzyndyǵy shamamen 462 shaqyrym bolatyn «Aqtóbe – Qyzylorda» avtomobıl jolynyń «Qyzylorda – Sekseýil» ýchaskesin rekonstrýktsııalaý kózdelgen. Jobany iske asyrý barysynda joldy I-b tehnıkalyq sanatqa aýystyrý, eldi mekenderdi aınalyp ótetin joldar salý, joldyń jekelegen bólikterin túzeý, jol jabynyn jańartý, ınjenerlik ınfraqurylymdy jańǵyrtý jáne jol qozǵalysy qaýipsizdiginiń zamanaýı standarttaryn engizý josparlanyp otyr.
Atalǵan joba «Batys Eýropa – Batys Qytaı» halyqaralyq kólik dáliziniń quramyna kiredi jáne eldiń tranzıttik áleýetin odan ári damytýǵa, marshrýttyń ótkizý qabiletin arttyrýǵa, jol júrý ýaqytyn qysqartýǵa jáne óńirler arasyndaǵy kólik qatynasynyń sapasyn jaqsartýǵa baǵyttalǵan.
Islam damý bankimen memorandým aıasyndaǵy yntymaqtastyq jobany daıarlaý jáne qurylymdaý, jobalaý men qurylys salasyndaǵy halyqaralyq standarttardy engizý, sondaı-aq jobany iske asyrýdyń ashyqtyǵy men tıimdiligin qamtamasyz etý baǵyttarynda júzege asyrylatyn bolady.
Sonymen qatar zamanaýı ınjenerlik sheshimderdi qoldanýǵa, kólik ınfraqurylymynyń ornyqtylyǵyn arttyrýǵa jáne halyqaralyq kólik-logıstıkalyq baǵyttardy odan ári damytýǵa jaǵdaı jasaýǵa erekshe nazar aýdarylady.
Kólik mınıstrligi elimizdiń negizgi avtojol dálizderin jańǵyrtý jáne iri ınfraqurylymdyq jobalardy iske asyrýǵa halyqaralyq qarjy ınstıtýttaryn tartý boıynsha júıeli jumystar júrgizip keledi.
