Qyzylorda polıtsııasy jas qyzdardyń kóliktegi ersi qylyǵyna baılanysty túsinikteme berdi
QYZYLORDA. KAZINFORM – Instagram áleýmettik jelisinde Qyzylorda qalasynda júrip kele jatqan kólikte ersi qylyq kórsetip trend túsirgen jastardyń vıdeosy tarady.
Vıdeoda jas qyzdardyń biri kólik syrtynda súıretilip kele jatqany, biri tereze aldyna jatyp alǵany, ózgesiniń salonnyń tóbesinen basyn shyǵaryp turǵany anyq kórinedi. Qyzylorda oblystyq polıtsııa departamenti osyǵan baılanysty túsinikteme berdi.
- Áleýmettik jelige monıtorıng júrgizý barysynda Qyzylorda qalasy kósheleriniń birinde Hyundai markaly avtokóliktiń jolaýshy tasymaldaý qaǵıdasyn buzǵanyn kórsetetin beınejazba jarııalanǵany anyqtaldy. Tekserý barysynda Qyzylorda qalalyq polıtsııa basqarmasynyń patrýldik polıtsııa qyzmetkerleri quqyq buzýshyny anyqtady.
Jol qozǵalysy erejesin óreskel buzǵan 23 jastaǵy azamatshaǵa qatysty jol júrisi qaǵıdalarynda kózdelgen jolaýshy tasymaldaý, qaýipsizdik beldigin paıdalaný jónindegi talaptardy saqtamaǵany úshin ákimshilik hattama rásimdedi, - delingen habarlamada.
Jaqynda qyzylordalyq tártip saqshylarynyń «Kıberqadaǵalaý» aqparattyq júıesi arqyly sıntetıkalyq esirtki zattaryn jarnamalaıtyn 71 saıtty buǵattaǵanyn jazǵanbyz.